İqtisadiyyat Nazirliyi yanında Əmlak Məsələləri Dövlət Xidməti "Dövlət əmlakının özəlləşdirilməsinin II Dövlət Proqramı”na və "İnvestisiya müsabiqəsinin keçirilməsi Qaydaları”na uyğun olaraq, "Sumqayıt Tikinti Xidmət” ASC-nin səhmlərinin 99,91%-nin satışı üzrə investisiya müsabiqəsi elan edib.
Xeberle.com bu barədə İqtisadiyyat Nazirliyinə istinadən xəbər verir.
Məlumata görə, Sumqayıt şəhəri, Kimyaçılar küçəsi, 55A ünvanında yerləşən müəssisənin özəlləşdirilməsi üzrə investisiya müsabiqəsinə ümumi nominal dəyəri 259 598 manat olan 129 799 səhm çıxarılıb. Müəssisənin ümumilikdə 79 021 manat öhdəlikləri var.
Müəssisənin özəlləşdirilməsi üzrə keçiriləcək investisiya müsabiqəsində iştirak etmək üçün iddiaçılar investisiya qoyuluşunun istiqamətləri, məbləği və müddəti göstərilməklə ümumi məbləği 1,2 milyon manatdan az olmayan investisiya proqramı təqdim etməli, yeni iş yerlərinin yaradılması, istehsal prosesinə müasir texnologiyaların tətbiqi, istehsal olunan məhsulun çeşidinin genişləndirilməsi ilə bağlı təkliflərini verməlidir.
Müsabiqənin qalibi səhmdar cəmiyyətin səhmlərinin alınmasına görə dövlət büdcəsinə 800 min manatdan az olmayan məbləğdə vəsaitin köçürülməsini təmin etməlidir. İddiaçıdan müsabiqənin şərt və tələblərinin icra olunacağına təminat verən 400 min manat məbləğində vəsaitin beh olaraq ödənilməsi tələb olunur.
Müsabiqənin qalibi nəticələr haqqında protokol təsdiq olunduğu tarixdən 30 gün müddətində səhmdar cəmiyyətin səhmlərinin alqı-satqı müqaviləsini imzalamalı, imzalandığı tarixdən 60 gün müddətində təklif etdiyi pul vəsaitini dövlət büdcəsinə köçürməli, ümumilikdə müqavilə ilə müəyyən olunan şərt və öhdəlikləri yerinə yetirməlidir.
Müsabiqədə Azərbaycan vətəndaşları ilə yanaşı, xarici investorlar da iştirak edə bilərlər.
İnvestisiya müsabiqəsinə çıxarılan dövlət əmlakı ilə aşağıdakı link vasitəsilə tanış olmaq mümkündür: https://bit.ly/3G2fz2y
İddiaçıların ərizə və təkliflərinin qəbulu 11 yanvar 2022-ci il tarixinə qədər iş günləri saat 10:00-dan 17:30-a qədər ƏMDX-da (ünvan: Bakı şəhəri, Xətai rayonu, Yusif Səfərov küçəsi, 50) aparılacaq.
Komissiya müsabiqə təkliflərini həmin ünvanda 12 yanvar 2022-ci il, saat 11:00-dan başlayaraq qiymətləndirəcək.
Xəbərdən istifadə edərkən istinad etmək vacibdir.
