Sumqayıt Kimya Sənaye Parkının (SKSP) fəaliyyəti üçün əlavə olaraq 127,96 hektar torpaq sahəsi ayrılıb. Hazırda sənaye parkının ümumi ərazisi 295,62 hektar təşkil edir.

Bu barədə İqtisadiyyat və Sənaye Nazirliyindən məlumat verilib. Bildirilir ki, Sumqayıt Kimya Sənaye Parkı üçün əlavə olaraq ayrılmış torpaq sahəsində müvafiq işlər görülür. Artıq parkın yeni torpaq sahəsinin inventarizasiyası aparılıb və inşaat işləri üçün pasportu alınıb. Yeni torpaq sahəsinin baş planı hazırlanır və bu işin ilin ortalarınadək başa çatdırılması nəzərdə tutulur. Baş plan təsdiq edildikdən sonra ərazidə olan texnoloji və mənəvi cəhətdən köhnəlmiş, yararsız bina və köhnə qurğuların sökülməsi, torpağın istifadəyə yararlı vəziyyətə gətirilməsi üçün tədbirlər görüləcək.

Məlumatda qeyd edilir ki, Sumqayıt Kimya Sənaye Parkının sənaye zonası 114 hektar təşkil edəcək. Burada aqro və tibb kimyası, məişət kimyası, tikinti sənayesi kimyası, elektronika və avtomobil sənayesi kimyası, polimerlər və sənaye avadanlıqlarının istehsalı üçün nəzərdə tutulmuş ərazilər yerləşəcək. Müasir üslubda dizayn edilmiş sosial zonada isə parkın rezidentləri üçün böyük imkanlar yaradılacaq. Burada 16 və 20 mərtəbəli inzibati binalar, sərgi-konfrans kompleksi, peşə təhsil mərkəzi, laboratoriya binası, emalatxanalar, açıq və qapalı idman meydançaları, sağlamlıq mərkəzi fəaliyyət göstərəcək.  (azertag.az)