"Neftdən gələn əlavə gəlirlər azad olunmuş ərazilərimizdə quruculuq işlərinə və sosial layihələrə sərf edilə bilər”
Xeberle.com bildirir ki, bunu Modern.az-a dünya bazarlarında neftin qiymətinin artması ilə bağlı cari ilin dövlət büdcəsinə yenidən baxılması ehtimalından danışan iqtisadçı deputat Vahid Əhmədov deyib.
Deputat qeyd edib ki, yüksək ehtimalla may ayında bu ilin dövlət büdcəsinə yenidən baxılacaq:
"Büdcə ilə əlaqədar məsələyə baxılması həmişə neftin qiymətindən asılı olur. Neftin qiyməti dünya bazarında artırsa, dövlət büdcəsinə Dövlət Neft Fondundan əlavə vəsaitlər daxil olursa, biz həmişə cari ilin büdcəsinə yenidən baxırıq. İndi də neftin qiyməti 130 dolları ötüb. Ukraynadakı müharibə ayın sonuna qədər davam etsə, neftin qiyməti 150 dollara qədər qalxa bilər. Dünən ABŞ prezidenti Co Bayden Rusiya neftinin idxalı ilə əlaqədar qadağanı açıqladı. İngiltərə baş naziri Boris Conson da bununla bağlı addıma hazırlaşır”.
Deputat həmçinin vurğulayıb ki, Avropanın qazla ümumi təminatının təxminən 2 faizə qədərini Azərbaycan həyata keçirir:
"Dünya bazarında qazın da qiyməti qalxır. Beləliklə, büdcəmizə daxil olan əlavə vəsaitlərin həcmi də yüksəlir. Dövlət büdcəsinə baxılması prezidentin rəyindən asılıdır. Ola bilər, vəsaitlər Dövlət Neft Fonduna yatırılıb, ehtiyat kimi saxlanılsın. Biz cari ilin büdcəsində neftin qiymətini 50 dollardan götürmüşük.
Hazırda Azərbaycanın qarşısında ciddi məsələlər dayanır. Azad olunmuş ərazilərdə yenidənqurma işləri üçün kifayət qədər vəsait lazımdır. Ola bilər ki, dövlət başçısının göstərişi ilə sosial layihələrlə bağlı da müəyyən addımlar atılsın”.
Xəbərdən istifadə edərkən istinad etmək vacibdir.
