Təlimi giriş sözü ilə MİDİB təşkilatının icraçı direktoru və layihə rəhbəri Arif Nəcimov açaraq layihə haqqında ətraflı məlumat verib. O, əlavə edib ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra olunan layihənin məqsədi, "Dövlət, Universitet və QHT əməkdaşlığı” çərçivəsində Sosial sahibkarlığın və müəssisələrin təşkilinin 120 nəfər gəncin arasında təbliği və məşğulluğun təmin olunmasına dəstək olmaqdır. 

Nəcimov A. bildirib ki, layihə 1 sentyabr 2022-ci il tarixindən başlayıb və üç ay ərzində davam edəcək. Layihə çərçivəsində 3 şəhərdə (Bakı ş., Xırdalan ş. və Sumqayıt ş.) 30 nəfərlik 4 qrupdan ibarət 120 nəfər gənc üçün bir günlük "Sosial sahibkarlığın və müəssisələrin təşkili” adlı praktiki təlim (iki dəfə çay-kofe və nahar fasiləsi daxil olmaqla) və 5 noyabr 2022-ci il tarixində layihənin yekununa həsr olunmuş sərgi-konfrans təşkil olunacaqdır. 

Layihə çərçivəsində təşkil olunacaq sərgi-konfransda təlim iştirakçıları qazandıqları bilik və təcrübələr əsasında öz layihə və ya uğurlu fəaliyyətlərinin nəticələrini tədbir iştirakçılarına və qonaqlara təqdim etmək şansları olacaqdır. Ən uğurlu layihə(lər)nin maliyyələşdirilməsi üçün dövlətin uyğun investisiya və ya qrant proqramlarına tövsiyyə edilməsi və maliyyələşməsi üçün MİDİB təşkilatının layihə işçi qrupu da dəstək olacaqdır. 

Sonra söz Gənclərin İnkişaf və Karyera Mərkəzinin (GİKM) Abşeron rayon nümayəndəliyinin rəhbəri Nigar Abdullazadəyə verilib. O, GİKM-nin hal-hazırda 55 şəhər və rayonda fəaliyyəti, icra etdikləri proqramlardan və layihələrdən, həmçinin gənclər üçün təklif olunan imkanlar haqqında ətraflı məlumatı təqdimatla çatdırıb. 

Təlim, sosial sahibkarlıq sahəsində təcrübəsi olan təlimçi Elbəy Əliyevin və Rəfiqə Nurullayevanın, həmçinin Azərbaycan Respublikasının Kiçik və Orta Biznesin İnkişafı Agentliyinin (KOBİA) nəzdində fəaliyyət göstərən KOB Dostu Abşeron regional koordinatorluğunun rəhbəri Etibar Əliyevin və "Birgə İnvest” MMC-nin layihələr üzrə baş meneceri Vidadi Baxışovun təqdimatları ilə davam edib. Onlar tələbələrə "Sosial və ekoloji problemlər”, "İcma quruculuğu və problemlərin birgə həlli yolları”, "Sahibkarlıq fəaliyyəti”, "Sosial sahibkarlıq”, "BMT-nin 17 Dayanıqlı İnkişaf Məqsədləri (DİM) və onların Sosial sahibkarlıqla (bizneslə) əlaqəsi”, "Biznes və marketinq planlama və onların əhəmiyyəti”, "Sosial-iqtisadi-ekoloji problemlərin qruplar (icmalar) çərçivəsində həll yolları” və "Dövlətin maliyyə və dəstək mexanizmləri” haqqında, həmçinin təmsil etdikləri qurumların fəaliyyəti, xidmətləri və əməkdaşlıq imkanları haqqında ətraflı məlumat veriblər.

Layihənin davamlılığını təmin etmək üçün MİDİB təşkilatının layihə işçi və ekspert qrupu tərəfindən təlim iştirakçılarına 6 aylıq "Biznes mentorluq” proqramı da təklif olunacaqdır. Bu proqram çərçivəsində təlim iştirakçıları "Dövlət, Universitet və QHT əməkdaşlığı” çərçivəsində öz sosial sahibkarlıq (biznes) fəaliyyətini daha peşəkarcasına təşkil etmək şansı qazanacaqlar.

Onu da qeyd edək ki, eyni məzmunlu təlim 22.10.2022-ci il tarixində Sumqayıt və 29.10.2022-ci il tarixində Bakı şəhərlərində də təşkil olunacaqdır. Növbəti təlimlərdə MİDİB təşkilatının layihə işçi qrupu tərəfindən hazırlanmış xüsusi link vasitəsilə qeydiyyatdan keçmiş və seçilmiş tələbə və gənclər iştirak edə biləcəklər. 

Təlimdə Qərbi Kaspi Universitetinin, Bakı Mühəndislik Universitetinin, Azərbaycan Dövlət İqtisad Universitetinin, Azərbaycan Kooperasiya Universitetinin, Azərbaycan Dövlət Neft və Sənaye Universitetinin, Azərbaycan Əmək və Sosial Münasibətlər Akademiyasının, Azərbaycan Dillər Universitetinin tələbələri və Gənclərin İnkişaf və Karyera Mərkəzinin  Abşeron rayon nümayəndəliyinin könüllüləri fəal iştirak etmişdirlər.

Təlimdə həmçinin "Vətən Naminə İnternet Tv”nin çəkilişi qrupu da iştirak etmiş və onlar layihə rəhbərindən, təlimçidən və tələbələrdən müsahibə götürmüşdür. Sözügedən çəkilişə baxmaq üçün təqdim olunan linkə daxil olub (https://youtu.be/5ZmTHmAms3Q) müsahibələri izləmək olar.