Sumqayıt şəhərində artıq neçənci hadisədir ki, ağaclar gecə saatlarında xəlvət şəkildə kəsilir.

Belə olaydan biri bu gün Sumqayıtın 42-ci məhəlləsində, 4 saylı binanın arxasında baş verib. Şikayətçilərin sözlərinə görə, gecə saatlarında naməlum şəxslər ağacları kəsərək ərazidən uzaqlaşıblar. XeberLent.az-ın əməkdaşı hadisə yerindən xəbər verib: "Gördüklərimiz şikayətçilərin haqlı olmasını göstərdi. Adıçəkilən ərazidə 6 dənə ağacın kəsilərək harasa aparılıdığına şahid olduq”.

Lakin müsbət hal ondan ibarət idi ki, hadisə yerində Sumqayıt şəhər Yaşıllaşdırma İdarəsinin rəhbəri İlyas Həsənov və işçiləri yeni ağaclar gətirərək, kəsilən ağacların yerinə əkirdilər. Yaşıllaşdırma İdarəsindən başqa, əraziyə Ekologiya və Təbii Sərvətlər Nazirliyinin əməkdaşları da gəlmişdilər. Onlar da öz qeydlərini apararaq nazirliyə məruzə edəcəklərini bildirdilər.

Onu da qeyd edək ki, Sumqayıt şəhərində ağacların kütləvi şəkildə kəsilməsinin mediada dəfələrlə işıqlandırılmasına baxmayaraq, qarşısı aidiyyəti qurumlar tərəfindən kəsərli şəkildə alınmır.

Məsələni nəzarətdə saxlayacağıq.

P.S. Biz yəqin bilirik ki, bu ağacları ərazidə obyekt-falan tikmək məqsədiylə kəsməyiblər, çünki şəhər rəhbərliyi ciddi şəkildə bəyan edib ki, ağac kəsilən yerdə heç bir obyekt tikintisinə icazə verilməyəcək! Bu, ya ruhi xəstələrin şüursuz şəkildə etdiyi işdir, ya da düşmən kəşfiyyatının fitnəsidir.