R. Mustafazadə: "Sumqayıt Regional Elektrik Şəbəkəsi” MMC-yə qarşı 70-dən çox iddia ərizəsi ilə məhkəməyə müraciət edilib

Bütün dünyada, eləcə də Azərbaycanda vətəndaşların sosial hüquqlarının pozulması problemi ümumi insan haqları sisteminin ən zəif sahəsi sayılır. Xüsusilə kommunal xidmət sektorunda vətəndaşların hüquqlarının pozulması kütləvi xarakter daşıyır. Hər gün elektrik enerjisi, qaz, su təchizatında fasilələrin olması, kommunal xidmətlərdə qeyri-müntəzəm təminatla hər birimiz qarşılaşırıq. Qeyd edək ki, hazırda Azərbaycanda abonentlərlə təchizatçı qurum arasında kommunal xidmətlərdən istifadəyə görə müqavilə imzalanır. Həmin müqavilədə isə tərəflərin hüquq və vəzifələri göstərilir. Amma bəzi yerli mütəxəssislər kommunal xidmət sektorunda təchizatçı müəssisələrlə abonent (əhali) arasında bağlanan həmin müqavilələrin birtərəfli olduğunu iddia edirlər. Bəzən tərəflər arasında yaranan mübahisələr məhkəmə səviyyəsinə qədər gəlib çıxır. Sumqayıtda da bu kimi hallara çox rast gəlinir.

Bəs istehlakçı hüqüqları pozulduğu halda nə etməlidir?

Demokratiya və İnsan Hüquqları Mərkəzinin hüquqşünası Ruslan Mustafazadə Xeberle.com-a bildirib ki, Azərbaycan Respublikasının"İstehlakçıların hüquqlarının müdafiəsi haqqında” qanununda istehlakçının hüquqları təsbit edilib: "Qanunda göstərilib ki, nəzərdə tutulan hallarda, lazımi keyfiyyəti olmayan, habelə, insanların sağlamlığına, həyatına təhlükəli olan malların (işlərin, xidmətlərin) vurduğu zərərin ödənilməsini tələb etmək, eləcə də öz hüquqlarının və qanuni mənafelərinin müdafiəsi üçün səlahiyyətli dövlət orqanlarına və məhkəməyə müraciət etmək hüququ var.”

Hüquqşünas qeyd edib ki, istehlakçılar bir çox hallarda öz hüquqlarını bilmirlər. Bildikləri halda isə bu hüquqların qorunması istiqamətində tədbirlər görməkdə maraqlı olmurlar: "Bəzən isə öz hüquqlarını bilən istehlakçılar heç bir iş görmürlər. Bəlkə də bu pozulmuş hüquqların bərpasına, dəymiş maddi və mənəvi ziyanın əvəzinin ödəniləcəyinə olan ümidsizlikdən irəli gəlir. Lakin qeyd etmək istəyirəm ki, son ildə istehlakçıların hüquqlarının pozulması ilə bağlı müraciətlərin sayı artıb.”

R. Mustafazədə Sumqayıtda bu müraciətlərin əsasən kommunal xidmətlər sektoru ilə bağlı olduğunu vurğulayıb: "Mənzil və ev sahibləri kommunal xidmət göstərən təşkilatların hərəkət və ya hərəkətsizliyindən narazı olur və məhkəməyə müraciət edirlər. "Sumqayıt Regional Elektrik Şəbəkəsi” MMC-yə qarşı 70-dən çox iddia ərizəsi ilə məhkəməyə müraciət edilib. Bu son 9 ayda bizə edilən müraciətlərin sayıdır. Bu ərizələr qanunsuz və əsassız olaraq tərtib edilən aktların etibarsız hesab edilməsi, heç bir qanuni əsas olmadan hesablanan borcların silinməsi ilə əlaqədər olub.”

Hüquqşünas əksər hallarda istehlakçı hüquqlarının pozulması ilə bağlı məhkəmənin vətəndaşların xeyrinə qərar çıxardığını da deyir: "Tərtib edilən aktların etibarsız hesab edilməsi və hesablanmış borcların silinməsi ilə bağlı pozuntular qeyd edildiyi hallarda məhkəmələr vətəndaşların xeyrinə qərarlar qəbul edib. Bu göstərici 90 faizə bərabərdir. Yalnız bizim tərəfimizdən aparılan işlər nəticəsində vətəndaşların 50 min manata yaxın borcu silinib”

R. Mustafazadə bəzi hallarda istehlakçıların öz hüquqlarını qorumaq istəməməsi səbəbindən külli miqdarda maddi ziyana düşdüyünü də sözlərinə əlavə edib.

Ramil Zeynallı
Xeberle.com