Zaman-zaman Azərbaycan futbolunun əsas bəlalarından olan süni örtüklü meydançalardan söz açırıq. Təəssüf ki, futbolun inkişafını düşünən ölkələrdən fərqli olaraq bizdə asan və əziyyətsiz yola qaçırlar. Klublarımızın və AFFA-nın timsalında bunu görmək olar. Söz düşəndə də deyirlər ki, təbii ota baxmaq əziyyətdir, çətindir filan.

Rekord.az-ın indi sizə təqdim etdiyi fotolar Sumqayıt şəhərində yerləşən 12 nömrəli məktəbin stadionundan çəkilib.

Əsaslı təmir olunan məktəbin stadionu da diqqətdən kənarda qalmayıb və çox tədqirəlayiq bir haldır ki, təmir zamanı stadiona təbii ot örtüyü döşənib. Ot örtüyünün yeni döşəndiyini və havaların soyuq fəslinə düşdüyünü nəzərə alsaq, bir neçə biçimdən sonra qazonun tam ideal vəziyyətdə olacağına şübhə yoxdur.

Buyurun, bu da sizə sübut. Adi bir məktəbdə təbii örtük saxlamaq mümkündürsə, deməli, bəzi klub rəhbərlərinin və AFFA rəhbərliyinin dedikləri cəfəngiyyatdan başqa bir şey deyil. Qoy süni örtüklərə qaçan və bununla da Azərbaycan futbolunun gələcəyini şikəst edənlər Sumqayıtdakı 12 nömrəli məktəbdən ibrət götürsünlər.