Yeni il başlar-başlamaz, Sumqayıtda ardıcıl partlayışlar baş verir

Yeni ilin ilk 19 günü ərzində şəhərdə müəmmalı dörd xoşagəlməz hadisə olub. Bu mistik partlayışların təsadüf, yoxsa planlaşdırılmış olması haqda müxtəlif iddialar səslənir. Rəsmi versiyalar bundan ibarətdir:
Ayın 3-də Sumqayıt şəhərində yanğın hadisəsi baş verdi. Vətəndaşa məxsus sexin ümumi sahəsi 15 kv.m olan otağında 1 ədəd yataq dəsti yandı. Otaq və ona bitişik sex yanğından mühafizə olundu. Yanğın saat 00:29-da yanğınsöndürənlər tərəfindən söndürüldü. Sex sahibinin kimliyi məlum deyil.
***
Yanvarın 14-də isə Sumqayıtda yanğınla nəticələnən partlayış nəticəsində 1 nəfər öldü, 2 nəfər xəsarət aldı. Şəhərin Tağıyev qəsəbəsində vətəndaşa məxsus ümumi sahəsi 200 kv.m olan ikimərtəbəli 7 otaqlı evdə yanğınla nəticələnən partlayış baş verdi. Yanğın nəticəsində evin 2-ci mərtəbəsinin yanar konstruksiyaları 100 kv.m sahədə yandı. Partlayışın zərbəsindən divarlarda çatlar əmələ gəldi və ev deformasiyaya uğradı.
Yanğın zamanı ev sahibinin qızı 1987-ci il təvəllüdlü Bağırova Ülviyyə Teymur qızının yanmış meyiti yanğınsöndürənlər tərəfindən aşkar olundu, 2 nəfər isə müxtəlif növ termiki yanıq xəsarətləri aldı. Yanğın saat 12:57-də yanğınsöndürənlər tərəfindən söndürüldü.
***
Yanvarın 16-da isə növbəti hadisə Sumqayıtda vətəndaşa məxsus sexdə oldu. Partlayış zamanı ümumi sahəsi 20 kv.m olan mağazanın dam örtüyü, əsas divarları, ona bitişik sexin dam örtüyü və arakəsmə divarları 60 kv.m sahədə dağıldı.
Sexdə dayanmış "Hyundai” və "Mitsubishi” markalı minik avtomobilləri dağıntı altında qaldı. Yanğınla nəticələnən partlayış zamanı mağazanın yanar konstruksiyaları, içərisində olan avtomobil ehtiyyat hissələri yandı və 2 nəfər müxtəlif dərəcəli xəsarətlər alaraq Təcili Tibbi Yardım tərəfindən xəstəxanaya aparıldı. Bitişik obyektlər yanğından mühafizə olundu. Yanğın saat 18:18-də yanğınsöndürənlər tərəfindən söndürüldü...

***

17 yanvar tarixində Sumqayıt şəhərində növbəti yanğın baş verdi: dördmərtəbəli yaşayış binasının üçüncü mərtəbəsində ümumi sahəsi 30 kv.m olan 1 otaqlı mənzilin döşəməsi 2 kv.m sahədə, 1 ədəd televizor və eyvanın qapısı qismən yanıb. Yanğın zamanı mənzillərdən 12 nəfər sakin yanğınsöndürənlər tərəfindən təxliyyə edilib. Mənzilin qalan hissəsi yanğından mühafizə olunub. Yanğın saat 20:54-də yanğınsöndürənlər tərəfindən söndürülüb.

Ümidvarıq bütün bu ardıcıl hadisələr sadəcə xoşagəlməz bir təsadüf nəticəsində baş verib. (axar.az)





Xeberle.com