Uzun müddətdir Sumqayıt gənclərinin həsrətlə gözlədiyi Gənclər Evi artıq bu ayın 13-də ölkə prezidenti İlham Əliyevin iştirakı ilə istifadəyə verildi. Qeyd edək ki, Gənclər və İdman Nazirliyinin sifarişi əsasında tikilən Gənclər Evinin məqsədi gənclərin özlərini bir şəxs kimi müəyyən etməsi və reallaşdırması, gənclərin təşəbbüslərinin dəstəklənməsi, inkişaf etdirməsinə yardım göstərməkdir. Bəs görəsən Gənclər Evinin fəaliyyətə başlaması Sumqayıt gənclərinin həyatında nəyi dəyişəcək?
Uzun müddət gənclər sahəsində çalışan mütəxəssis İsmayıl Kərimov Xeberle.com-a deyib ki, Sumqayıtda Gənclər Evinin olmasını müsbət qarşılayır. Amma Gənclər Evi qurulanda bir sıra spesifik xüsusiyyətlər nəzərə alınmayıb: "Gənclər Evi qurulanda region gənclərinin spesifik ehtiyacları və maraqları nəzərə alınmalı idi. Məsələn, Goranboy rayonundakı mərkəzdə boulinq zalı var. Halbuki bu, Sumqayıtda daha çox maraq oyada bilərdi. Yəni bu spesifik ehtiyaclar nəzərə alınmayıb.”
İ.Kərimov qeyd edib ki, Gənclər Evində göstəriləcək bəzi xidmətlərdə sinxronluq mövcuddur. Məsələn Art-studio, yəni gənc rəssamlar üçün otaq mövcuddur: "Bu, əslində Uşaq və Yeniyetmələrin Yaradıcılıq Mərkəzində mövcuddur. İkincisinə nə ehtiyac var? Şahmat otağı da var. Halbuki şəhərimizdə Şahmat Məktəbi bu ehtiyacı ödəyir. Bunların əvəzinə başqa xidmətlər təklif oluna bilərdi.”
Bununla yanaşı isə, bir sıra xidmətlərin fəaliyyət göstərməsi təqdirəlayiqdir: "Karyera mərkəzinin mövcudluğu, psixoloq xidməti, hüquq xidməti, intellektual oyunlar üçün şəraitin olması, caz-klub, video-studio kimi xidmətlər, habelə konfrans və təlimlərin təşkili üçün otaq və avadanlıqlar ən üstün cəhətlərdən biridir.”
Amma məsələ bununla da bitmir. Təchizat məsələnin ikinci dərəcəli hissəsidir. Burada bir sıra suallar yaranır:
- "Bütün bu xidmətləri qurmaq üçün effektiv menecment və xidmətləri həyata keçirəcək zəruri insan resurslarını təmin etmək mümkün olacaqmı?
- Gənclərin o mərkəzə marağını artırmaq üçün PR sistemini necə qurmaq lazımdır? Bütün dəyişikliklər məhz bu son iki suala düzgün cavab tapılmasından asılıdır."
Mütəxəssis sözlərinə onu da əlavə edib ki, əks halda şəhərimizdəki gənclər siyasətində ciddi dəyişiklik olmayacaq.

R.Zeynallı
Xeberle.com