Sumqayıt şəhər İcra Hakimiyyəti və Gənclər və İdman Baş İdarəsinin təşəbbüsü ilə 2 Fevral – Gənclər günü münasibəti ilə "Sumqayit Gəncləri 2015-ci ildə – vəzifələr və perspektivlər” mövzusunda şəhər gənclərinin toplantısı keçirilib. Sumqayıt şəhər Gənclər və İdman Baş İdarəsindən Xeberle.com-a verilən məlumata görə, toplantıdan öncə tədbir iştirakçıları ümummilli lider Heydər Əliyevin abidəsini və Şəhidlər Xiyabanı Kompleksini ziyarət ediblər. 

Sumqayıt Gənclər Evində keçirilən toplantını giriş sözü ilə açan Gənclər və İdman Baş İdarəsinin rəisi Elşən Baxşəliyev respublikada gənclər siyasətinin əsasının qoyulmasının ümummilli lider Heydər Əliyevin adı ilə bağlı olduğunu nəzərə çatdırıb, Gənclər gününün yaranma tarixindən danışıb. Onun çıxışında 2014-cü ildə gənclərlə iş sahəsində görülmüş işlər ətraflı təhlil edilib, 2015-ci ildə keçirilməsi nəzərdə tutulan tədbirlərə toxunulub.

Məruzə ətrafında Yeni Azərbaycan Partiyası (YAP) şəhər təşkilatı İdarə Heyətinin üzvü Ceyhun Məmmədov, Sumqayıt Dövlət Universiteti (SDU) "Ritorika Universal Klubu”nun sədri Arzu Nəbizadə, "Best Friends” Təhsil və Karyera və "Panda School” Məktəbəqədər Tədris mərkəzlərinin direktoru Elvin Dadaşov, YAP SDU ərazi ilk təşkilatı Gənclər Birliyinin sədri Səma Əsədova, "Azərkimya” İstehsalat Birliyi Gənclər Birliyinin sədri, Etilen-Politilen zavodunun piroliz sahəsinin rəisi İlqar Qurbanov, 21 №-li tam orta məktəbin XI sinif şagirdi Səma Məmmədzadə çıxış ediblər. Çıxışlarda şəhər gənclərinin fəaliyyətindən və vəzifələrindən danışılıb. Əldə edilən uğurların dövlətin qayğısı və dəstəyilə mümkün olduğu nəzərə çatdırılıb. 

Tədbirdə şəhər İcra Hakimiyyətinin başçısının müavini Elgin Həbibullayev iştirak və çıxış edib. O, dövlət başçısı İlham Əliyevin uğurlu daxili və xarici siyasətinin Azərbaycanın beynəlxalq imicinin yüksəldilməsi ilə nəticələndiyini, bu siyasətin aparıcı istiqamətlərindən birini gənclər siyasətinin təşkil etdiyini qeyd edib. Həmçinin Sumqayıt gənclərinin əldə etdiyi uğurlardan, qarşıda duran vəzifələrdən danışıb.

Sonra 2014-cü ildə fərqlənən gənclər və gənclər təşkilatları on yeddi nominasiya üzrə Baş İdarənin plaketlərilə təltif ediliblər.

Mədəniyyət və Turizm İdarəsi Nəriman Nərimanov adına mədəniyyət evi ilə birgə mədəniyyət evinin akt zalında "Gələcək bizimlədir!” adlı konsert təşkil edilib. Tədbir zamanı 2 Fevral – Azərbaycan Gəncləri Günü münasibətilə şəhərimizin dəyərli şəxsiyyətlərinin gəncliyə ünvanlanmış canlı salamını özündə əks etdirən video-film ilk dəfə olaraq nümayiş etdirilib.