Sumqayıtda bir qrup bağbanın yanvar ayı üçün ödənilən əmək haqqı azaldılıb. Bu barədə Xeberle.com-a Sumqayıt şəhər Hacı Zeynalabdin qəsəbəsində bağban işləyən Elçin Qələndərov məlumat verib. E.Qələndərovun sözlərinə görə, qəsəbədə ondan başqa daha 17 bağbanın yanvar ayı üçün verilən maaşından kəsilib. Bağban bildirdi ki, əvvəllər 134 manat əmək haqqı alırdısa, indi ötən ay üçün əlinə çatan 105 manat olub: "Maaşımdan 29 manat kəsiblər. Ümumilikdə 18 bağbanın əmək haqqı azalma ilə, yəni 105 manat verilib.”
E.Qələndərov məsələ ilə bağlı Sumqayıt Şəhər İcra hakimiyyətinin Hacı Zeynalabdin qəsəbəsi üzrə icra nümayəndəsi Nasir Rzayevlə görüşdüklərini də sözlərinə əlavə edib: "İcra nümayəndəsi bizə bildirib ki, əmək haqqının azaldılması onların səlahiyyətində deyil. Bu məsələyə yuxarı instansiyalar baxır.”

Məhəmmədəli Paşayev