Sumqayıt Dövlət Dram Teatrında Sumqayıt Regional Mədəniyyət İdarəsi tərəfindən Dünya Azərbaycanlılarının Həmrəyliyi Günü və Yeni İlə həsr olunan "Gücümüz həmrəyliyimizdədir” adlı ilin yekun hesabat konserti keçirilib.
Xeberle.com xəbər verir ki, əvvəlcə Azərbaycan Respublikasının ərazi bütövlüyü uğrunda canından keçən, adları çəkiləndə ruhları qarşısında baş əydiyimiz şəhidlərin əziz xatirəsi bir dəqiqəlik sükutla yad edilib.
Sonra regionun mədəni həyatında fəal iştirakına görə mədəniyyət müəssisələrinin bir qrup əməkdaşı fəxri fərmanla təltif olunub.
Daha sonra tədbirdə çıxış edən Milli Məclisin deputatı Müşfiq Məmmədli, Sumqayıt Regional Mədəniyyət İdarəsinin rəisi Rəşad Əliyev, YAP Sumqayıt şəhər təşkiatının sədri Ramiz Hüseynov, Sumqayıt Şəhər İcra Hakimiyyətinin şöbə müdiri Fərman Kazımov qonaqları bayram münasibətilə təbrik edərək, bu bayramın dünya azərbaycanlılarının birlik, həmrəyliyi günü olduğunun, Vətənimizə bağlılıq, milli-mənəvi dəyərlərə hörmət hisslərini özündə aşıladığını vuğulayıblar.
Dünya azərbaycanlıları milli mənlik şüuru əsasında sıx birləşməyin əhəmiyyətini indi daha dərindən dərk edirlər. Onlar anlayırlar ki, ölkəmizin gələcəyi, milli dövlətçiliyimizin davamı məhz onların sıx birləşməsindən və fəaliyyətindən asılıdır.
Öncəliklə vurğulayaq ki, Sumqayıt Regional Mədəniyyət İdarəsi tərəfindən 2022-ci ilin yekununa nəzər salanda görürük ki, 44 günlük Vətən müharibəsində müqəddəs amal uğrunda vuruşaraq canını fəda edən, ölümləri ilə ölümsüzlük qazanan şəhidlərimizin və qəhrəman qazilərimizin ailələrindən 18 nəfəri işlə təmin edilmişdir. Həmçinin Sumqayıt Regional Mədəniyyət İdarəsinin göstərişi və təşəbbüsü ilə N.Nərimanov adına Mədəniyyət Mərkəzi və tabeliyində olan mədəniyyət müəssisələri tərəfindən şəhidlərin xatirəsi əziz tutularaq anım günləri, xatirə gecələri, tematik gecələr keçirmişdir. Dövr ərzində şəhid və qazi ailələrinin üzvlərinə 900 dəfədən çox geyim, oyuncaq və bayram sovqatları paylanmışdır.
Hesabat dövründə Sumqayıt Regional Mədəniyyət İdarəsinin tabeliyində olan mədəniyyət müəssisələri ümumilikdə: 1750 - festival, müsabiqə, xatirə gecəsi, yubiley, sərgi (səyyar sərgi), kitab bayramı, mədəniyyət günləri ilə əlaqədar mədəni-kütləvi tədbirlər keçirmişlər ki, bu tədbirlər də əhatə dairəsinə, məzmununa görə böyük əhəmiyyət kəsb edir. Keçirilən tədbirlər əhalinin dünyagörüşünün zənginləşməsinə, intellektual səviyyələrinin zənginləşməsinə, eləcə də onların asudə vaxtlarının səmərəli təşkilinə töhfə vermişdir.
Tədbirin bədii hissəsi "Sumqayıt” ansamblının hazırladığı konsert proqramı ilə davam etmişdir. Yeni yaradılan ansamblın bədii rəhbəri və dirijoru Şərqiyyə Mustafayevadır. Konsertdə səsləndirilən Ü.Hacıbəyovun "Koroğlu”, C.Cahangirovun "Füzuli kantatası”, Amil Həsənoğlunun "Alagöz”, Sumqayıt Muğam Mərkəzinin direktoru, "Tərəqqi” medallı Aytən Məhərrəmovanın Mahur Təsnifi, Televiziya Muğam müsabiqəsinin qalibi Sədəf Budaqovanın "Qəşəngdir”, Sumqayıt şəhər Bülbül adına 2 nömrəli Uşaq İncəsənət Məktəbinin 4-cu sinif şagirdi Nuray Şahsuvarlının "Kəsmə Şikəstə”, Taleh Rəsulovun A.Zeynallının "Ölkəm”, A.Piazzolla "Libertango” və Məlahət Hüseynovanın "Qarabağ Şikəstəsi” tamaşaçılarda bayram abu - havası yaratmışdır.
Xəbərdən istifadə edərkən istinad etmək vacibdir.
