"Reduco” Tədris Mərkəzinin dəstəyi  ilə  Sumqayıt Dövlət Universiteti Ritorika Universal Klubunun Mədəniyyət və İncəsənət Klubu  yeni layihəyə start verib.  Layihə çərçivəsində gənclər Ebru sənətinin incəliklərini öyrənəcək, praktiki olaraq rəsmlər çəkəcəklər.
Bu gün layihə çərçivəsində ilk təlim keçirilib. Bakıda Ebru Sənət Mərkəzində ebru sənət dərsləri keçən  layihənin təlimçisi olan Vüsal Karakaşlı  tədbir iştirakçılarına Ebru sənətinin özəllikləri haqqında məlumat verib. Mütəxəssis bildirib ki, bu sənətin nə zaman və harda meydana gəldiyi dəqiq bilinmir. Amma deyilənlərə görə Ebrunu Orta Asiyadakı Cığatay türkləri yaradıb. O, ebru sözünün ebrə sözündən törədiyini və "damarlı” mənasını verdiyini deyib: "Damarlı çünki suyun üzərində yaranan naxışlar  damara bənzəyir,  buluda da bənzəyir ki, İrana keçdikdən sonra ona ebri deyirdilər.  Ebridəki  "buluda bənzər” deməkdir. Abru da deyiblər su üstü. Sonra Osmanlıya keçir bu sənət. Orda da ebru adını alır.”
Rəssam söyləyib ki, digər təsviri sənət növlərindən fərqli olaraq ebru sənəti ilə məşğul olan insan hər zaman mənəvi baxımdan bu işə hazırlıqlı olmalıdır: "Çünki  çox güclü rəssam olsan belə amma sənin bir sıxıntın, nəyəsə bir  mənfi  hisslər emosiyalar varsa suya yansıyır. Çox həssasdır su. Ani bir hərəkət yansıyır. Hətta suyun rənglərinə belə yansıyır. Bu qəribə görsənə bilər. Amma  həqiqətən də  belədir. Bir deyək ki, rəngkar mənfi bir hisslərini də verə bilər verməlidir də. İfadə etməlidir özünü. Amma ebru bunları qəbul eləmir, yəni pozitiv, müsbət şeyləri qəbul eləyir.”
V. Qaraqaşlı  əyani şəkildə Ebru sənətinin incəliklərini gənclərə nümayiş etdirib. O, qeyd edib ki, təbii sənət olan ebrunun hazırlanmasında kimyəvi maddələrin qatışığı olmur: "Bunun üçün yalnız təbii ləvazimatlardan, torpaqdan alınma boyalardan istifadə edilir. Boyalara mal-qaradan alınan öd əlavə edilir, buna səbəb isə ödün tərkibindəki turşunun boyaları suyun üzərində incəldib açmasıdır”. Burada istifadə olunan su da hansının ki, üzərinə boyaları səpirik o da  xüsusi sudur, qatılaşdırılmış sudur. Müxtəlif maddələrdən alınır. 50 növ  maddə var ki, onun suyu hazırlana bilər. Boyalar da suyun üzərinə xüsusi fırçalarla səpilir”.
Sənətkar deyibki, fırçalar at quyruğundan düzəldilir. O, bunu boyaların atın tükündən rahat süzülməsi və  fırçaların bakteriyanı toplamaması ilə əlaqələndirir: "Fırçaların budaqları da fərqlidir. Yəni qızılgül budağından hazırlanır. Onun bir həm davamlı, həm rahat olduğu üçün, həmdəki bunun simvolik mənası  da var. Qızıgül bilirik ki, peyğəmbərimizin rəmzidir. Heç bir ebru da təkrar olunmur. Heç bir ebruda heç bir naxış təkrar olunmaz. Yəni o fırçadan tökülən o damcı  bir daha eyni şəkildə olmaz”.
Mütəxəssis   ebrunun dincəlmək üçün faydalı, zövq alınacaq  bir sənət olduğunu vurğulayıb.Sonda gəncləri maraqlandıran suallar cavablandırılıb.
Xeberle.com