Sumqayıt Regional Mədəniyyət İdarəsinə tabeli Nəriman Nərimanov adına Mədəniyyət Mərkəzinin 6 saylı Folklor klubu və 2 saylı Sumqayıt Regional "ASAN xidmət” Mərkəzinin könüllülərinin birgə təşkilatçılığı ilə Nəriman Nərimanov adına Mədəniyyət Mərkəzində Azərbaycan Respublikasının Prezidenti cənab İlham Əliyevin 29 sentyabr 2022-ci il tarixli Sərəncamına əsasən Azərbaycan Respublikasında 2023-cü ilin "Heydər Əliyev ili” elan edilməsi ilə bağlı ulu öndər Heydər Əliyevin 100 illik yubileyinə həsr olunan musiqili konsert proqramı təşkil olunub.
Xeberle.com xəbər verir ki, tədbirdə Azərbaycan Respublikasının Dövlət Himni səsləndirilib. Ümumilli lider Heydər Əliyevin xatirəsi və torpaqlarımız uğrunda canlarından keçən şəhidlərimizin ruhu bir dəqiqəlik sükutla yad edilib. Sonra Sumqayıt şəhər İcra Hakimiyyətinin ictimai-siyasi və humanitar məsələlər şöbəsinin müdir müavini Fərman Kazımov çıxış edərək, ulu öndər Heydər Əliyevlə bağlı xatirələrini, onun Sumqayıt şəhərinin və digər Azərbaycan şəhərlərinin inkişafına necə qayğı göstərdiyi haqqında gənclərimizə ətraflı məlumatlar verib. Daha sonra 2 saylı Sumqayıt Regional "ASAN xidmət" mərkəzinin könüllülərinin hazırladıqları şeir və mahnılar ifa edilib. Respublikamızın əməkdar artisti Fəzilə Rəhimovanın rəhbərlik etdiyi "Folk Music Band" qrupu üzvlərinin müşaiəti ilə Ulu Öndərimizin sevdiyi mahnılar səsləndirilib.
Xəbərdən istifadə edərkən istinad etmək vacibdir.
