Sumqayıt Dövlət Dram Teatrında son üç ayda axşam tamaşalarının təşkili intensivləşib. Növbəti axşam tamaşası da böyük maraq doğurub.
Xeberle.com-un məlumatına görə, ötən gün əməkdar incəsənət xadimi Əli Əmirlinin qələmə aldığı, teatrın baş rejissoru, Xalq artisti Firudin Məhərrəmovun quruluş verdiyi "20 ildən sonra" ailə dramı nümayiş etdirilib.
Məlumat üçün bildirək ki, aprel ayının 22-də yaradıcı heyət bu tamaşa ilə Azərbaycan Teatr Xadimləri İttifaqının "Qonaq teatr" layihəsi çərçivəsində Bakıda Aktyor evində çıxış etmişdi.
Qeyd edək ki, Sumqayıt tamaşaçıları tərəfindən də maraqla qarşılanan səhnə əsərində bir aktyorun taleyi əks olunub. Geridə qalmış şöhrət, tamaşaçı alqışı, həyatın sərt üzü, sevgidə yaranan boşluq, 20 illik bir ailəni dağılmaq təhlükəsi qarşısında qoyur. Gərgin və təzadlı səhnələr fonunda davam edən tamaşanın finalı hamını heyrətə salır.
Sevgi sınağını göstərən tamaşada əməkdar artistlər Xatira Süleymanova, İlahə Səfərova, Rauf Ağakişiyev, Cəlal Məmmədov, aktyorlar Mətləb Səfərli, Kamran Murad, Məryəm Hüseynli və Etibar Emirli çıxış edirlər.
Tamaşaçılar arasında ziyalılar, şəhər ədəbi ictimaiyyətinin nümayəndələri və gənclər üstünlük təşkil edib.
Xəbərdən istifadə edərkən istinad etmək vacibdir.
