Sumqayıt sakinlərinin mədəni istirahətini təmin edən Sumqayıt Dövlət Dram Teatrı gənclərin sağlamlığının qorunması, möhkəmləndirilməsi, sağlam həyat tərzinin təmin edilməsi, narkomaniya, alkoqolizm və digər neqativ halların azalması, aradan qaldırılmasına kömək məqsədilə, maarifləndirici "Narkoman” tamaşasını təqdim edib.
Xeberle.com xəbər verir ki, Tamaşanın nümayişində məqsəd, gənclərin zərərli vərdişlərdən uzaqlaşdırılması, sağlam gənc nəslin yetişdirilməsi, vətənpərvər, müasir Sumqayıt gəncliyinin formalaşdırılmasına nail olmaqdır. Qeyd edək ki, "Narkoman" tamaşasının müəllifi Kamran Nəzirli, quruluşçu rejissoru Xalq Artisti Kamran Quliyevdir.
Səhnə əsərində rolları Şəmistan Süleymanlı, Yeganə Məmmədvəliyeva, İlham Səfərli, İradə Zeynalova, Sevda Hüseynova, Rövşən Əsgərov, Rövşad İlyasov, İlahə Səfərova, Məryəm Hüseynli, Aynur Hümmətova, Cavanşir Eyyubzadə canlandırıb.
Qeyd edək ki, tamaşanı izləyənlər sırasında Milli Məclisin deputatları Mehriban Vəliyeva, Elnarə Akimova, YAP Mərkəzi Aparatının Gender siyasəti və gənclərlə iş şöbəsinin müdiri Zəkiyyə Musayeva, Abşeron - Xızı regional İdman və Gənclər idarəsinin rəis müavini Rüfət Mahmudzadə, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupunun Milli İnformasiya sektorunun müdiri Raqif Allahverdiyev və Səhiyyə Nazirliyi Sumqayıt Şəhər Narkoloji Dispanserinin şöbə müdiri, həkim-narkoloq Vüsal Cabbarov olub.
Xəbərdən istifadə edərkən istinad etmək vacibdir.
