Dekabrın 2-də "Abşeron” qalereyasında Rəhim Həşimovun "Femina” adlı fərdi sərgisi açılacaq. "Arts Council Azerbaijan”ın təşkilatçılığı, Mədəniyyət və Turizm Nazirliyinin dəstəyi ilə keçiriləcək bu sərginin kuratoru Nurziyə Xəlilovadır.

"Azərbaycan İncəsənət Konsulluğu”ndan AZƏRTAC-a bildirilib ki, Rəhim Həşimov Amadeo Modilyani, Qustav Klimt, Anri Matiss kimi rəssamların əsərlərindən ilhamlanaraq portretlər yaradır. O deyib: "Hər rəssam istəyir ki, gözəl olanı əks etdirsin. Kimsə bunu mənzərə, kimsə natürmort yaradaraq həyata keçirir, mən isə qadınların portretini çəkərək edirəm. Axı qadın ən gözəl xilqətdir, özü də təkcə zahirən deyil, mənən də gözəldir”.

R.Həşimov bir sıra kollektiv sərgilərdə iştirak edib, əsərləri mühüm vernisajlarda nümayiş olunub. Rəssam fərdi sərgisinin açılacağını özünə böyük şərəf bilir.

R.Həşimov Sumqayıtda doğulub. Uşaq vaxtından şəkil çəkməyə maraq göstərən rəssam incəsənət məktəbini qurtarıb. Lakin tale elə gətirib ki, o, həkim olub. Sumqayıtın təcili tibbi yardım xəstəxanasında on illik həkim-travmatoloq stajı Rəhim Həşimova asudə vaxtlarını fırça və rənglər dünyasına həsr etməyə mane olmur.

2016-cı il yanvarın 10-dək davam edəcək sərgiyə giriş sərbəstdir.