Sumqayıt Dövlət Rəsm Qalereyasında Beynəlxalq Aktiv Sənətçilər Birliyi (Uluslararası Aktivist Sanatçılar Birliyi) və Beynəlxalq Qadın Rəssamlar Birliyinin (Uluslararası Qadın Rəssamlar Birliyinin) üzvlərindən ibarət aktiv rəssamlar qrupunun Sumqayıt şəhərindəki yaradıcılıq birliklərinin üzvləri və ictimaiyyətlə görüşü keçirilib.

Görüşün keçirilməsində əsas məqsəd Beynəlxalq Aktiv Sənətçilər Birliyi ilə Sumqayıt rəssamlarının birgə əməkdaşlığı və onların xarici ölkələrdə tanınmasından ibarətdir.

Sumqayıt Dövlət Rəsm Qalereyası və Ə.Kərim adına Poeziya klubunun təşkilati dəstəyi ilə keçirilən görüşdə rəssam Nəvai Metinin başçılıq etdiyi 10 nəfərdən ibarət rəssamlar qrupu və Azərbaycanın Əməkdar İncəsənət xadimi, sənətşünas Ziyadxan Əliyev, sumqayıtlı rəssam və şairlər iştirak edib.

Tədbiri giriş sözü ilə açan şair İbrahim İlyaslı UASB haqqında məlumat verdi və bildirdi ki, birliyin həyata keçirdiyi "Yurdumuzu qarış-qarış gəzək” layihəsinin Sumqayıtda gerçəkləşməsi Sumqayıt mənzərələrinin rəssamların fırçası ilə ölkə hüdudlarından kənarda tanıtımı xarakteri daşıyır.

Birliyin sədri tanınmış rəssam Nəvai Metin çıxış edərək birliyin əsas şüarının SÜLH, SƏNƏT və SEVGİ olduğunu bildirib.

O, daha sonra Azərbaycanda təşkil olunan sərgilərlə xarici ölkələrdə təşkil olunan sərgiləri fərqləndirərək qeyd edib ki, ölkəmizdə keçirilən fərdi sərgilər rəsmi xarakter daşıyır. Lakin, Türkiyədə fərdi sərgisi təşkil olunan rəssam sərgi zamanı canlı rəsm çəkir ki, bu da tamaşaçılar tərəfindən daha təbii qəbul olunur. Rəssam bu üsulun Azərbaycanda keçirilən fərdi sərgilərdə tətbiqinə böyük onəm verdiyini vurğulayıb.

Sənətşünas Ziyadxan Əliyev çıxış edərək Müstəqil Azərbaycan rəssamlıq sənətini sovet Azərbaycanı rəssamlıq sənəti ilə müqayisə edərək bildirib ki, əvvəl rəssamlara lazım olan azadlıq yox idisə, indi isə keyfiyyət çatışmır: "Bu problemlərin aradan qaldırılması üçün rəssamlar öz üzərlərində ciddi çalışmalıdırlar.”

Görüşdə həmçinin Sumqayıtda Azərbaycan Rəssamlar İttifaqının Sumqayıt bölməsinin yaradılması təklif olunub.

Görüşün sonunda dərnəyin kiçik üzvü Nahid Hüseynov "Balaca aktivist” mükafatına layiq görülüb, təşkilati dəstəyə görə Sumqayıt Dövlət Rəsm Qalereyasına təşəkkür edilib.

Xeberle.com