Sumqayıtın Tarixi Muzeyində 20 Yanvar faciəsinin 26-cı ildönümü ilə əlaqədar Bülbül adına 2 saylı uşaq incəsənət məktəbi ilə birgə "20 Yanvar-əsarətin son gecəsi” mövzusunda anım mərasimi keçirilib. Tədbiri giriş sözü ilə açan kütləvi ekspozisiya şöbəsinin müdiri S.Əmirova, Sumqayıt Dövlət Universitetinin Tarix və Coğrafiya fakultələrinin müəllimi, Tarix üzrə fəlsəfə elmləri doktoru Samir Kərimli, Tarix və Coğrafiya fakültəsinin tələbələri Mirşamxal Həsənli və Fərid Vaqifli o, müdhiş gecədə Bakıda törədilmiş qanlı hadisələr zamanı soydaşlarımızın başına gətirilən faciələrin məqsəd və nəticələrini geniş təhlil edərək fikir və düşüncələrini bölüşüblər. Sonda muzeyin direktoru, əməkdar mədəniyyət işçisi O.İslamova imperiyanın qanlı terror aktına hüquqi-siyasi qiymət verilməsində ümumilli lider Heydər Əliyevin tarixi xidmətlərini vurğulayıb. Tədbirdə muzeyin fondundan "Bakı, 20 Yanvar 1990” adlı sərgisi və 2 saylı incəsənət məktəbinin şagirdlərinin "20 yanvar uşaqların gözü ilə” mövzusunda rəsm sərgisi təqdim olunub.
Sumqayıt şəhər Mədəniyyət və Turizm Idarəsinin mətbuat xidmətindən Xeberle.com-a verilən məlumata görə, Q.Qarayev adına uşaq musiqi məktəbində Mərkəzi Uşaq Kitabxanası ilə keçirilən tədbirdə də şəhidlərin xatirəsi bir dəqiqəlik sükutla anılıb. Daha sonra 19-undan 20 yanvara keçən gecədə baş verən hadisələr haqqında məruzə və çıxışlar olub. Tədbirdə məktəbin şagirdlərinin ifasında vətənpərvərlik ruhunda şeirlər səsləndirilib, mahnılar ifa edilib.
F.Əmirov adına UMM-də "Azadlığa gedən yol" adlı tədbir keçirilib. G.Sviridovun "Romans"ı ifa edilib, məktəbin müəlliməsi S.Dünyamalıyevanın ssenarisi əsasında hazırlanmış "Ağ göyərçin" adlı xalq rəvayətindən səhnəcik nümayiş etdirilib, şagirdlərin ifasında şəhidlərə həs olunmuş şeirlər dinlənilib.
S.Rüstəmov və Ə.Bakıxanv adına UİM-lərdə keçirilən anım günündə səhidlərin xatirəsinə klassik musiqi səslınib, şagirdəlrin ifasında 20 yanvara həsr olnmuş şeirlər dinlənilib, rəsm sinfinin şagirdlərinin əl işlərindən ibarət sərgiyə baxış keçirilib.
S.Vurğun adına Mərkəzi kitabxana anım günü ilə bağlı dəyirmi masa keçirib. Kitabxananın direktoru Y.Əhmədova, kitabxanaçı A.Əliyeva və digərləri çıxış edərək 20 Yanvar faciəsini Azərbaycan xalqının mərdlik, mübarizlik simvolu kimi səciyyələndiriblər.
Mərkəzi uşaq kitabxanasında "Milli qürur və qəhrəmanlıq salnaməsi" adlı ədəbi-bədii kompozisiya keçirilib. Digər şəhər kitabxanalarında da dəyirmi masa təşkil edilib, mühazirələr oxunub, ədbiyyata açıq baxış keçirilib, video-çarx nümayiş olunub.