Sumqayıt şəhər N.Nərimanov adına mədəniyyət mərkəzində 8 Mart Beynəlxalq Qadınlar gününə həsr olunmuş tədbir keçirilib. Tədbiri giriş sözü ilə açan qocaman mədəniyyət işçisi Felman Lazımov xanımları təbrik edərək, xoş arzularını çatdırıb, işlərində uğurlar arzulayıb. Daha sonra 6 xanım mədəniyyət sahəsində səmərəli fəaliyyətinə görə N.Nərimanov adına mədəniyyət mərkəzi tərəfindən fəxri fərmanla təltif olunub.

Tədbir mədəniyyət evlərinin özfəaliyyət kollektivlərinin ifasında konsert proqramı ilə davam edib. Gənc müğənnilər Zaur Yusifli, Pənah Məmmədov, Ravin Əliyev, İlkin Əlizadə, Leyla Məmmədova, Şəbnəm Faiq qızı və s. ifasında xalq və bəstəkar mahnları, İlham Həsənov və Gülbəniz Aslanovanın ifasında xanımları vəsf edən şeirlər, aşıq Elməddin Məmmədlinin ifasında "Ruhani” aşıq havası alqışlarla qarşılanıb. Eyni zamanda illüziyaçı Fərhad Dadaşovun bir-birindən maraqlı illüziya nömrələri, "Turan”, "Şahinlər” rəqs qruplarının, eyni zamanda, gənc rəqqasların ifasında çobanlar, fars və özbək rəqsləri tamaşaçılara xoş anlar yaşadıb.

Qeyd edək ki, bütün uşaq incəsənət və musiqi məktəblərində də bayram konserti keçirilib.

Şagird və müəllim kollektivinin ifasında mahnılar ifa olunub, şeirlər dinlənilib.