Sumqayıtlı kinoaktyor Ruslan Sabirli şəhidlərimizin əziz xatirəsinə musiqi bəstələyib. O, Xeberle.com-a bu barədə söyləyib:

"Hər birimiz son günlər cəbhə bölgəsində baş verən hadisələr zamanı Azərbaycan dövlətinin nə qədər güclü və qüdrətli orduya malik olmasinin şahidi olduq. Xalqımızın nümayiş etdirdiyi birlik və həmrəylik bir daha sübut etdi ki, biz 20% işğal altında olan torpaqlarımızı geri qaytarmaq iqtidarındayıq. Baş verənlər məni də həm qürrələndirir, həm kədərləndirirdi və təbii ki, buna biganə qala bilməzdim. Çünki, mənim ailəm də Qarabağ müharibəsində 2 nəfər şəhid verib: kiçik dayım Kazım İsayev və böyük dayımın oğlu Elxan İsayev. Hiss etdiklərimi notlara köçürdüm. Bəstələdiyim musiqini qısa bir zamanda Gürcüstanda aranjiman etdirdim və dünən gecə hazır oldu. Musiqi "Zirvə” adlanır. Niyə məhz Zirvə?! Çünki, bu musiqidə həm son günlərdə geri qaytardığımız torpaqlar – qalibiyyət zirvəsi, həm də bu müharibədə həlak olan şəhidlərimizin əldə etdiyi şəhidlik zirvəsi əks olunur. Kompozisiyanı şəhidlərimizin əziz xatirəsinə ithaf edirəm. Allah qoysa, bu musiqiyə klip də çəkilər... Tezliklə. Elə məhz Qarabağ torpağında”!

Xeberle.com