Sumqayıt şəhər Mədəniyyət və Turizm idarəsinin Mətbuat xidmətindən verilən məlumata görə məktəbdə ümummilli lider Heydər Əliyevin anadan olmasının 93-cü ildönümü münasibətilə  yığıncaq keçirilib. Yığıncağı giriş sözü ilə məktəbin direktoru İlham Məmmədov açıb. Tədbirdə Azərbaycan torpaqlarının bütövlüyü uğrunda canından keçmiş şəhidlərimizin ruhu bir dəqiqəlik sükutla yad edilib və Ulu öndərin keçdiyi həyat yolu barədə məlumat verilib. YAP Sumqayıt şöbəsinin şura üzvü, "Xəzər” Səhmdar cəmiyyətinin sədri Qüdrət Kərimov tədbirdə iştirak edib və ulu öndərlə bağlı xatirələrindən danışıb. 
Bəstəkar Qənbər Hüseynlinin 100 illik yubileyinə həsr olunmuş musiqili-ədəbi tədbir də böyük maraq doğurub. Tədbirdə bəstəkarın həyat və yaradıcılığına həsr olunmuş sənədli film nümayiş etdirilib, məktəbin şagird və müəllimlərinin ifasında əsərləri dinlənilib. Bəstəkarın məhşur əsərləri tamaşaçılar tərəfindən böyük rəğbətlə qarşılanıb.
Şagirdlərin dünya görüşünün artması, musiqi zövqünün formalaşdırılması məqsədilə məktəbdə bir sıra tədbirlər keçirilib. "Vals” musiqisi mövzusunda keçirilən tədbir də bu qəbuildəndir. Tədbirdə "Vals”ın yaranma tarixi və inkişafı barədə geniş məlumat verilib, Avstriya, Rus və Azərbaycan bəstəkarlarının yaradıcılığında vals musiqisinin əhəmiyyəti nəzərə çatdırılıb, Avropa və Azərbaycan bəstəkarlarının əsərləri səslənib. Vyanada "Valsın kralı” adlandırılan İohan Ştraus haqqında ətraflı məlumat verilib.
Milli Musiqinin təbliği, körpə uşaqları milli musiqi alətlərimizlə tanış etmək məqsədilə məktəbin fortepiano və xalq çalğı alətləri şöbəsinin müəllim və şagirdlərinin iştirakı ilə "Qar qız” uşaq bağçasında himayə konserti keçirilib.
Tədbir uşaqların və müəllimlərin ifasında Azərbaycan Dövlət himninin ifası ilə başlanıb. Tədbirdə uşaqların ifasında xalq mahnıları və rəqs nömrələri böyük maraqla qarşılanıb. Tədbirin sonunda bağçanın müdiri Arzu Şammədova müəllim və şagirdlərə öz minnətdarlığını bildirib, uğurlar arzulayıb.
Məktəbdə həmçinin dövlətçilik ənənələrinin və insan hüquqlarının təbliği məqsədilə "Dövlətin əsas meyarı” mövzusunda tədbir keçirilib.  Tədbirdə cıxışlar dinlənilib, sullar geniş şəkildə cavablandırılıb.
"28 May” Respublika gününə həsr olunmuş hesabat konserti də  böyük maraqla qarşılanıb. Konsert məktəbdə fəaliyyət göstərən bütün şöbələri əhatə edib, şagirdlərdən ibarət xor kollektivlərinin çıxışı, müxtəlif alətlərin ayrılıqda solo ifası dinlənilib.