Bu günlərdə Sumqayıt şəhər "28 May” diyarşünaslıq evinin nəzdində fəaliyyət göstərən "Xalq teatrı” 16 illik fasilədən sonra yenidən tamaşaçıların görüşünə gəlib. "Xalq teatrı” yeni kollektivlə Əhməd Orucoğlunun "Qayınana əməliyyatı” komediyasını səhnələşdirib. Bu mədəni hadisəni nəzərə alıb kollektivlə görüşüb yaxından tanış olmaq onlarla həmsöhbət olmaq istədik. Üz tutduq "28 May” mədəniyyət evinə. Gənc kollektiv bizi çox mehribanlıqla qarşıladı. Onlarla söhbət əsnasında məlum oldu ki, bu işdə onlara yardımçı olanlar da var.
Söhbətə mədəniyyət evinin rəhbəri Vüsal Yaqublu başlayaraq bildirdi ki, bu iş təsadüfən ərsəyə gəlməyib:
- Əslində mədəniyyət evində xalq teatrı adı olsa da, uzun illər fəaliyyətsiz olub. Şəhər Mədəniyyət və Turizm idarəsinin rəisi Mehman Şükürov bunları nəzərə alaraq irəli sürdüyümüz təklifə müsbət yanaşdı və bu fəaliyyətsizliyə son qoydu. Bizə işi qurmaq üçün tam şərait yaratdı. İlk olaraq, Xocalı kompozisiyası ilə çıxış etdik. Daha sonra Amil Babayevin qurluşunda Əhməd Orucoğlunun "Qayınana əməliyyatı” komediyasını səhnələşdirdik. Bu işdə həm də quruluşçu rəssam kimi Aytən Xanəliyeva, musiqi tərtibatçısı kimi Kazım Əsgərli, səhnə tərtibatçısı kimi Rəşid Qocayevin də əməyi böyükdür. Yaradıcı işdə bizə ən çox köməyi isə Sumqayıt Dövlət Dram Teatrının aktyoru Yalçın Səlimov göstərib.

 

- 16 ildən sonra yenidən xalq teatrını qurmaq çətin olmadı ki?

Təbii, hər işdə çətinlik olduğu kimi, burda da çətinlik bizdən yan keçmədi. Amma bacarıqlı kollektiv bunun da öhdəsindən gələ bildi. Əvvəlcə kollektivə aktyor bacarığı olan insanları cəlb etdik. Peşə məktəbinə etdiyimiz müraciət cavabsız qalmadı. Orada təhsil alan bir neçə tələbə: Məhərrəmova Bikəxanım, İsmayılova Nərmin, Mehdiyev Meybulla, Məstəliyev Əli, Məcidov Cəlal, Hüseynova Mətanət bizə könüllü olaraq qoşuldular. Daha sonra SDU-nun tələbəsi Hüseynli Məryəm sıralarımıza gəldi. Tamaşanın rəssam işini mədəniyyət evimizin rəssam-dizayneri Aytən Xanəliyeva icra etdi. Çalışdıq ki, işimizin öhdəsindən layiqincə gələk. Çünki 16 ildn sonra bunu etmək özü bir məsuliyyət tələb edirdi.

- Kollektiv demək olar ki, gənclərdən ibarətdir. Bəs gənclərin özlərinin necə, bura gəlməkdə məqsədi nədir?

Gənclər cavab verir:
Bizim mədəniyyət sahəsinə, xüsusi ilə teatr və kinoya böyük həvəsimiz var. Məhz bu həvəs, bu istək bizi bura gətirdi. Gəldiyimizə də heç peşman olmadıq. Çünki isti münasibət və işini sevən insanlarla işləmək həqiqətən də çox rahatdır.
- Yəqin ki bu sahəyə gəlirsinizsə, ən azı tamaşaçı kimi bizim aktyorlarımızın oyununu izləyirsiniz. Ümumiyyətlə hansı tamaşalara baxır, hansı aktyorları bəyənirsiniz?

Sumqayıt teatrında bir neçə tamaşaya baxmışıq. ”Qocanı öldürməliyik”, ”Öldür məni can-ciyər” ən çox bəyənidiyimiz tamaşalardandır. Aktyor kimi isə Nurəddin Mehdixanlı, Sənubər İsgəndərli, Rafael Dadaşov, Fuad Poladov, Sumqayıtdan isə Mətləb Səfərlini çox bəyənirik.

Gələcək fəaliyyətinizlə bağlı nə düşünürsünüz?

Gələcək planımız sentyabr ayı üçün Üzeyir Hacıbəyov yaradıcılığına müraciət edəcəyik. Artıq bununla bağlı işlərə başlanılıb. Ümid edirik ki, səviyyəli bir iş ortaya qoya biləcəyik.

Xatırladaq ki, "Xalq teatrı” 1975-ci ildə "Tənqid-təbliğ teatrı” adı ilə fəaliyyətə başlayıb. 1976-cı ildə səhnələşdirilən A.Mehdiyevin "Belə-belə işlər”, "Uşağa bir üç yazın”, 1980-ci ildə S.Rəhmanın "Güzgü” satirik tamaşaları böyük maraqla qarşılanıb. 1981-ci ildə "Xalq teatrı” adı ilə fəaliyyətinə davam edib. 1990-cı ildə B.Vahabzadənin "Atılmışlar” əsəri ilə fəaliyyətinə davam edən "Xalq teatrı” 2000-ci ildə M.Şabanovanın "Azərbaycan dünyam mənim” kompozisiyası ilə fəaliyyətini dayandırmışdı. Sevindirici haldır ki, teatr yenidən fəaliyyətini bərpa edib.

Hazırladı Kamal Almuradlı

Xeberle.com

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.