Sumqayıt Mədəniyyət və Turizm İdarəsinin balansında olan Poeziya klubunun artıq yeni ünvanı müəyyənləşib.

Belə ki, əvvəllər Heydər Əliyev adına parkda ulu öndərin adını daşıyan mərkəz Poeziya evi kimi fəaliyyət göstərəcək. Artıq mərkəzin üzərinə yeni ünvanın adını əks etdirən lövhə də vurulub.

Məlumat üçün bildirək ki, Əli Kərim adına Sumqayıt şəhər poeziya klubu 1990-cı ilə kimi şəhərin müxtəlif mədəniyyət evlərinin nəzdində ictimai əsaslarla fəaliyyət göstərib. Klubun müdiri yetərincə tanınan şair İbrahim İlyaslıdır. Qeyd edək ki, Sumqayıtda ulu öndərin adını daşıyan yeni mərkəzin tikintisi başlayanda bir çoxları tərəfindən keçmiş binanın necə və hansı profildə fəaliyyət göstərəcəyi maraq doğururdu. Hətta həmin mərkəzin söküləcəyi barədə də söz-söhbətlər yaranmışdı. İndiyə kimi Sumqayıt şairlərinin normal fəaliyyət göstərməsi və yığıncaqlarının keçirilməsi müşgül məsələyə çevrilmişdi. Bu mərkəzin Poeziya evinə verilməsi qərarı şəhər ictimaiyyəti tərəfindən də təqdirəlayiq hal kimi qiymətləndirilib.