Rəssamlar İttifaqının
Vəcihə Səmədova adına sərgi salonunda tanınmış rəssam İntiqam Ağayevin fərdi
sərgisi açılıb.
Xeberle.com xəbər verir ki,
sərgidə rəssamın 70 rəngkarlıq əsəri nümayiş olunur. "Xatirələrim” adlanan
sərgi bir həftə davam edəcək.
Nümayiş olunan tablolarda
əsasən Bakı, Sumqayıt və Abşeron lövhələri tədim edilir.
Tədbirdə Rəssamlar
İttifaqının sədri, Xalq rəssamı Fərhad Xəlilov istedadlı sumqayıtlı sənətkarın
bədii yaradıçılığından və onun Qarabağ savaşındakı iştirakından danışıb.
Bildirilib
ki, rəssamın isti və əlvan boyalarla işlənmiş əsərlərini digər rəssamların
əsərlərindən rahat seçmək olur. Bütövlükdə vətənpərvərlik motivləri İ.Ağayevin
işlərinə xas xüsusiyyətdir. Bu əsərlərin əksəriyyəti rəssamın Qarabağ
döyüşlərində qazandığı "Asiman” təxəllüsü ilə göstərilir.
Qonaqlar Rafiq Kərimov,
rəssamın döyüşçü yoldaşı Əlisəfa Mehdiyev, Naxçıvan Rəssamlar Birliyinin sədri
Ülviyə Həmzəyeva və memar Ramiz Hüseynov rəssam barədə ürək sözlərini söyləyiblər.
Qeyd edək ki, tədbirdə Sumqayıt şəhər İcra
Hakimiyyəti Başçısının müavini Teymur Səmədov və Sumqayıt şəhər Mədəniyyət və Turizm İdarəsinin rəhbəri Mehman Şükürov da iştirak ediblər.
Məlumat üçün bildirək ki, İntiqam
Ağayev 1965-cı ildə Sumqayıtda anadan olub. Ə.Əzimzadə adına Azərbaycan Dövlət
Rəssamlıq Məktəbinin məzunudur. Bir çox yerli və beynəlxalq sərgilərdə uğurla
təmsil olunub.
ARİ-nin üzvü olan rəssamın əsərləri Dövlət Rəsm Qalereyasında və şəxsi kolleksiyalarda qorunur.
Xəbərdən istifadə edərkən istinad etmək vacibdir.
