Bildiyiniz kimi, Şahan Gökbakanın çəkdiyi "Rəcəb İvedik5" filminin sonuncu fraqmentində 2 boksçu arasında keçirilən yarışda azərbaycanlı idmançıya qarşı çox kobud bir hərəkətə yol verilmişdir. Bu haqlı olaraq bir xeyli narazılığa səbəb olmuşdur. Buna ilk etiraz edən Giresun Universitetinin keçmiş rektoru, Prof. Dr. Aygün Attar olmuşdur. Aygün xanım istər Azərbaycandan, istər Türkiyədən olan qınaqlara, bəzilərinin "...çox cılız məsələdir" deməsinə rəğmən bu olayı diqqətdə saxlayaraq ilk gündən buna etiraz etdi və qarşılığında Şahan Gökbakar cavab videosu yayımlayaraq Azərbaycan türklərindən üzr istəmişdir. Aygün xanım Türkiyənin "Kanal D" və digər qatıldığı proqramlarda bununla razılaşmadığını, sona qədər mübarizəni davam etdirəcəyini söyləyərək o fraqmentin filmdən çıxarılmasında israrlı olduğunu, lazımi yerlərə bununla bağlı müraciət etdiyini bildirmişdir. Sevindirici haldır ki, Türkiyə Böyük Millət Məclisində, Türkiyə Azərbaycan Dostluq qrupu başqanı, habelə millət vəkilləri də Aygün xanımın bu təşəbbüsünə qoşularaq sözügedən fikirləri dəstəklədiklərini və həmin fraqmentin çıxarılması üçün lazımi yerlərə müraciət edəcəklərini bildirmişdilər. Və budur artıq filmin ssenaristi və baş rol oyunçusu bununla bağlı geniş açıqlama verdi və bildirdi ki, həmin fraqment filmdən çıxarılmış və o Azərbaycan türklərinin öz canı, qardaşı olduqlarını, onları üzmək kimi bir fikirlərinin olmadığını söyləmiş, buna görə də Azərbaycan xalqından üzr istədiyini bəyan etmişdir. Xatırladaq ki, hörmətli professorumuzun bu təşəbbüsünə Türkiyədə fəaliyyət göstərən QHT-lər, Azərbaycan Diaspor Təşkilatı rəhbərləri və tanınmış şəxslər, jurnalistlər, tələbələr də qoşularaq dəstək veriblər. Xatırladaq ki, Aygün xanımın bu məsələyə ilk reaksiyası "Hürriyət", "Milliyət", "Sözcü", "Vatan" kimi beynəlxalq qəzetlərdə, Türkiyənin "Star", "Kanal D" kimi böyük telekanallarında yer aldı. Qeyd edək ki, Aygün xanım bu işin təşəbbüskarı olaraq "Kanal D"də səhər proqramının qonağı olacaq.
Bildiyimiz kimi, Aygün xanım tək bu məsələdə deyil, erməni soyqırımı məsələsində də erməni yalanlarına qarşı beynəlxalq konferanslarda, dünya miqyaslı tədbirlərdə öz etirazlarını bildirmiş, PKK terror qruplaşması ilə təkbaşına mübarizə aparan çox az sayda ziyalılardan biridir. HDP başqanı Dəmirtaşa 1 il öncə erməni soyqırımı var dediyinə görə məhkəmədə ona qarşı iddia irəli sürmüş ziyalımızdır. Bütün təzyiqlərə baxmayaraq öz bildiyi həqiqətlərdən geri çəkilməyən bu xanım qatıldığı bütün tədbirlərdə Azərbaycan həqiqətlərini bəyan edir. 30 ildir Türkiyədə yaşamasına və türk vətəndaşı olmasına baxmayaraq bir gün də olsun Azərbaycanı unutmayan, ən çətin anlarda vətəninin, millətinin yanında olan dəyərli Azərbaycan ziyalısıdır.
Arzu Qocayev
Xeberle.com
Xəbərdən istifadə edərkən istinad etmək vacibdir.
