Xeberle.com-un əldə etdiyi məlumata görə Kimyaçı mədəniyyət sarayının istifadəyə veriləcək müddəti bəlli olub. Bu barədə Sumqayıtda 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağında çıxış edən Azərkimya İB-nin rəhbəri Muxtar Babayev sarayın bu ilin sentyabrında təhvil veriləcəyini bildirib.
Məlumat üçün onu da deyək ki, Azərbaycan Respublikasının prezidenti İlham Əliyev Sumqayıta sonuncu səfəri zamanı bu sarayın yenidən qurulması prosesinin yubadılmasını irad kimi bildirmiş və yaxın zamanda təhvil veriləcəyinə ümid etdiyini söyləmişdir.
Sumqayıtın 1986-cı ildə istifadəyə verilmiş bu ən böyük mədəniyyət sarayında şəhərin bir çox təntənəli tədbirləri keçirilib. Vaxtı ilə, Sarayın səhnəsində və ona bitişik böyük meydanda həm bizim, həm də xarici ölkələrin məşhur artistləri çıxış ediblər.
Qeyd edək ki, təmirə dayanana qədər sarayın üçmərtəbəli binasında 1063 nəfərlik böyük konsert salonu, 204 nəfərlik akt zalı, konfrans zalı, dərnəklər üçün 56 iş və məşq otağı olub. Burada 16 bədii özfəaliyyət dərnəyində 350 yeniyetmə məşğul olub.

Xəbərdən istifadə edərkən istinad etmək vacibdir.