Abşeron rayonunun Novxanı kəndindəki "Şah Sultan Hüseyn" məscidi bir zamanlar qədim yaşayış məskəninin mərkəzi olub. İndi isə baxımsız vəziyyətdə gözdən könüldən uzaq düşüb. Məscid Səfəvi hökmdarlarından olan Şah Sultan Hüseynin göstərişi ilə inşa edilib. Birmərtəbəli, kürsülü tikilən məscid 4 otaqdan ibarət olub. Tikilini geniş həyət əhatə edib. Əvvəllər bura Novxanı camaatının yeganə ibadət evi olub. "Şah Sultan Hüseyn" məscidinin daha bir tarixi əhəmiyyəti Azərbaycan Xalq Cümhuriyyətinin qurucusu Məhəmməd Əmin Rəsulzadənin İosif Stalini iki dəfə ölümdən xilas edərək, məhz bu məsciddə gizlətməsindədir.Bir vaxtlar SSRİ rəhbərlərindən birini ölümdən qurtaran bu memarlıq abidəsinin özünü isə hələ ki, xilas edən tapılmır. Zaman-zaman kənd sakinləri öz hesablarına məscidi təmir etmək istəsələr də buna icazə verilməyib. Məscidlə bağlı daha bir acınacaqlı məqam rütubət çökən, uçub-dağılan divarlarında onun tarixi abidə olduğunu, dövlət tərəfindən qorunduğunu əks etdirən hər hansı bir lövhənin olmamasıdır. Yalnız primitiv qaydada  "Şah Sultan Hüseyn məscidi" yazısı var ki, onu da kənd sakinləri hazırlayıb. Məscid yerli əhəmiyyətli və mühafizə olunan tarixi abidələr siyahısında olsa da görünən mənzərə bunun əksini düşünməyə əsas verir. Gözümüzdən qaçmayan daha bir məqam məscidin daxili divarında yenə də tarixə etinasız qalmayan sakinlərin yazdığı "Diqqət! Abidə çökmək üzrədir! Təmir edilsin!" xəbərdarlığıdır. Mədəniyyət və Turizm Nazirliyində isə məsələdən xəbərdardırlar.  Əgər "Şah Sultan Hüseyn" məscidini dağılmaq təhlükəsindən qurtaran olmazsa, çox güman ki, bir qədər sonra  onun barəsində keçmiş zamanda danışılacaq.

Xəbərdən istifadə edərkən istinad etmək vacibdir.