"Dünya nağaraları” adlı musiqi yarışmasında Azərbaycan 3-cü dəfədir ki yarışacaq. Bu dəfə də ölkəmizi Sumqayıtdan "Rövşən” ritm qrupu təmsil edəcək. Qrupun yaradıcısı və rəhbəri Rövşən Cabbar Xeberle.com-a öz təəssüratlarını bölüşüb: " Artıq 3-cü dəfədir ki, 14-cü beynəlxalq ritm festivalında iştirak edirəm. Və ikinci dəfədir ki, Tolyattiyə festivaldan bir həftə qabaq gedirəm. Orada müxtəlif ölkələrdən gələn ritm həvəskarlarına ustad-dərsləri keçəcəm. Böyük diqqət və səbr tələb edən bir işdir. Çünki orada öz sənətimi təmsil etməkdən öncə, Azərbaycan adından çıxış edəcəm. Bu ilin festivalı ötənilkilərə nisbətən daha məsuliyyətli olacaq mənim üçün. Çünki bu festivala dünyaşöhrətli sənətkar, ən əsası müəllimim Misirli Əhməd də gələcək. Məni festivaldan öncə dərslər keçməyə dəvət etsələr də, mən oraya ustadım qarşısında, sanki, imtahan verməyə gedirəm. İnşallah bu sınaqdan da üzüağ çıxaram. Ustadla bir səhnəni paylaşmaq sözün əsl mənasında qürurverici olduğu qədər də, həyəcanlıdır. İnanıram ki, bu dəfə də vəzifəmin öhdəsindən uğurla gələrək Azərbaycanımızı layiqincə təmsil edəcəm” – sitatın sonu.

Qeyd edək ki, Rövşən Cabbar gələcəkdə də bu cür festivallara qatılaraq hər zaman musiqi dəyərlərimizi təbliğ etməyə hazır olduğunu söyləyib.