Eyruz Məmmədov "Sumqayıtın əks-sədası” qəzetinin baş redaktoru: "Hazırda Kütləvi İnformasiya Vasitələri Azərbaycanda sürətlə inkişaf edir. Elektron medianın inkişafı, informasiya bolluğu, qəzetlərin konkret ideologiyasının olması, sağlam düşüncəli jurnalist nəslin yetişməsi və s. kimi hallar məni şəxsən sevindirir. 15-20 il bundan əvvələ nəzər salsaq, görərik ki, gündə bir qəzet nəşr olunurdu və bu qəzetlər yalnız özlərinin şəxsi mənafelərini güdürdülər. Düzdür, hazırda elə bir qəzet yoxdur ki, onda rentabellik olsun.Amma deyərdim ki, bir çox gündəlik qəzet var ki, biz onları bu gün də daimi olaraq izləyirik. Mən böhtan  xarakterli yazılardan da danışmaq istərdim, hansı ki, onlar insanlarda özlərinə qarşı mənfi münasibət yaradır. Kimisə tənqid edə bilərsən, amma tənqidi də gərək elə edəsən ki, qərəzli olmasın.Düşünürəm ki, jurnalist ilk növbədə obyektiv olmalı, yaşadığı məkandan asılı olmayaraq ictimai-siyasi hadisələri düzgün qiymətləndirməli və daim aktual olan məsələləri işıqlandırmalıdır.Hər hansı biri ilə sırf şəxsi münasibəti pis olduğu üçün onun haqqında qərəzli məlumat verilməsini jurnalist etikasına zidd hesab edirəm.Mən istər elektron media, istərsə də digər media orqanları vasitəsilə jurnalistikamızın yüksək şəkildə inkişaf edəcəyinə inanıram”.

  Qüdrət Muğanlı "Sumqayıt” qəzetinin baş redaktoru, əməkdar jurnalist və şair:  "Həmişə demişəm ki, mətbuat orqanı nə qədər çox olarsa, bir o qədər yaxşıdır. Bu mətbuat, söz nümayəndələri ki, var, onlar riyakar, pislik edən insanlar olmurlar.Allah ümumilli lider Heydər Əliyevə qəni-qəni rəhmət eləsin ki, 1998-ci ildə o, senzuranı ləğv etdi.Bunun nəticəsidir ki, hazırda jurnalistlər öz sözlərini azad, müstəqil şəkildə deyə bilirlər.İndi ölkəmizdə çox qəzet dərc olunur, amma elələri var ki, bu işi ucuzlaşdırırlar.Baxırsan ki, bəzi qəzetlər dilin qrammatik, leksik normalarına əməl etmirlər, cümlənin nə başı bilinir, nə də ayağı”.

  Aida Eyvazlı jurnalist:  "Bəlkə də çoxları məni bu fikirlərimə görə qınayacaq, amma özümün də internetdən istifadə etməyimə baxmayaraq düşünürəm ki, o, jurnalistikamızı korladı. Vaxt var idi ki, yaşlı-başlı jurnalistlərimiz də həmkarının işlətdiyi ifadələrin bir sətrini belə istifadə etmək üçün, zəng edib həmin şəxsin razılığını alırdılar. Bu, mümkün olmadığı təqdirdə cümlənin altında həmin şəxsə istinad edərək yazırdılar: "filankəsin dediyinə görə...” Hazırda bəzi jurnalistlərimiz var ki, media qanunlarını kobud şəkildə pozurlar.Onlar böhtan, yalan tipli məlumatlar yazaraq jurnalist etikasına da xələl gətirirlər. Yadımdadır ki, mən jurnalistikaya təzə gələn vaxtlar atam məni qarşısında oturdub dedi ki: "Ay bala, birdən böhtan, yalan məlumatlar yazarsan. Əgər böhtan, yalan yazsan, qələm sənə qənim olsun”.Qərəzli, əsassız məlumat yazarkən ən azı "Molla Nəsirəddin” ənənələrindən, yediyimiz çörəkdən utanmalıyıq.  Hazırda elə bil jurnalistikanın abır-həyasını əlindən alıblar.Buna bariz nümunə kimi efirlərimizi göstərmək olar.Mənim kiminsə yataq otağı nəyimə lazımdır axı?!Bədənlərini açıb qoyduqları kimi, jurnalistikanı çılpaqlaşdırmaq olmaz.Mən düşünürəm ki, mətbuatımız, efirlərimiz vətənpərvərliyi təbliğ etməli, cəmiyyəti maarifləndirməlidirlər.Hazırda efirdə bir dənə də olsun kitab verilişi yoxdur.Elə götürək mənim "Qalibiyyət, şəhidlər və şahidlər” kitabımı. Sosial şəbəkələr olmasaydı, kim oxuyacaqdı və ya kitab barədə haradan məlumat əldə edəcəkdilər?! Bizim köhnə komediyalarımız, tamaşalarımız var idi.İndi  Mədəniyyət kanalından başqa, heç bir televiziya kanalı onları efirə vermir. 

  Əli Nəcəfxanlı şair, jurnalist: "Azərbaycan jurnalistikası bu gün texniki vasitələr və İKT baxımından yüksək səviyyədədir. Amma jurnalist peşəkarlığı, xüsusən də dil-üslub və bədiilik baxımından zəifləmə kəskin hiss olunur.Yeni nəsil jurnalistlərimiz bu sahənin təməl prinsipi olan "müqayisə-təhlil-nəticə" formulundan sanki xəbərsizdirlər.Araşdırma jurnalistikası yox dərəcəsindədir. Necə deyərlər, ürəkdən tikan çıxaran, az da olsa, heyrət yaradan yazılar çox azdır''.

 

  Rafiq Oday Azərbaycan Respublikasının Yazıçılar və Jurnalistlər Birliyinin üzvü, Azərbaycan Jurnalistlər Birliyi Sumqayıt şəhər təşkilatının sədri, «Azərikimya» İstehsalat Birliyinin mətbuat xidmətinin rəhbəri, «Möhtəşəm Azərbaycan» ictimai-siyasi, ədəbi-bədii qəzetinin təsisçisi və baş redaktoru, şair, publisist: "Mən şəxsən jurnalistikamızın hazırkı vəziyyətini qənaətbəxş hesab etmirəm. Dövlətin dövlət olması və digər dövlətlər tərəfindən qəbul olunması üçün dörd şərt var ki, bunlardan dördüncüsü mətbuatdır.Əgər mətbuat öz missiyasını kənara qoyub digər işlərlə məşğuldursa, demək ki, özünü, dördüncü hakimiyyət adını doğrulda bilmir.Bugünkü jurnalistikamız, jurnalistlərimiz baş verən prosesləri mətbuata doğru şəkildə daşıya bilmirlər, əksinə mətbuat onların arxasınca sürünüb gedir.Jurnalistika dördüncü hakimiyyət olması üçün mətbuat nümayəndələri qlobal məsələlərdən yazmalı və düzgün mövqe ortaya qoymalıdır.Mətbuatda bu gün filan müğənninin toyu oldu və ya üzr istəyirəm, filankəs yarıçılpaq gəzdi kimi xəbərləri daha çox işıqlandırılır, halbuki onların Azərbaycan cəmiyyətinə zərrə qədər xeyiri yoxdur.  Hazırda ölkəmizdə o qədər işıqlandırılmalı və aktual olan mövzular var ki, onlar qalıb bir kənarda, lazımsız məlumatlar gün üzünə çıxarılır. Şəxsən mən həmin  mövzulara həsr olunan yazılar görəndə xəcalət çəkirəm. Həmin şəxslər əsl mətbuatın nə demək olduğunu bilmirlər.Mən düşünürəm ki, onlar mətbuata təsadüfi gəlmiş insanlardırlar.Çünki yalnız yazı qabiliyyəti olmayan insanlar böyük, qlobal məsələlərə toxuna bilmədiklərindən, bu kimi yarasız məlumatları kütləyə aşılamağa çalışırlar.Bundan başqa mən başlıq məsələsinə də toxunmaq istəyirəm.Hazırda bir çox redaktorumuz saytda yerləşdirilən məqalələrə elə başlıqlar qoyurlar ki, onun xəbərlə qəti şəkildə əlaqəsi olmur və onların 70-80 faizi mətn ilə heç bir şəkildə uyğunluq təşkil etmir.Reytinq xətrinə mətbuatımızı bu qədər cılızlaşdırmaq, bataqlığın içərisinə salmaq lazım deyil. Lakin yenə də ümidsiz deyiləm, sadəcə düşünürəm ki, mətbuatımız bu kimi jurnalist adına xələl gətirən insanlardan təmizlənməli, ələnməlidir. İnanıram ki, müəyyən müddətdən sonra mətbuat öz-özünü tənzimləyəcək və jurnalistikamıza təsadüfən gəlmiş insanlar kənara çəkilib öz işləri ilə məşğul olacaqlar”.