İlk olaraq Sumqayıt şəhər İcra Hakimiyyəti başçısının I müavini Teymur Səmədov və Azərbaycan Respublikası Mədəniyyət Nazirliyinin İncəsənət şöbəsinin müdiri İsmayıl Hüseynov YUĞ teatrına direktor təyin olunan İslam Həsənovu və Sumqayıt Dövlət Dram Teatrının yeni direktoru Mübariz Həmidovu təbrik edib. Xeberle.com-un verdiyi məlumata görə, çıxış edənlər M.Həmidovun uzun illər təcrübəli teatr direktoru olmasını və tezliklə SDDT-nin inkişaf etməsi sahəsində mühüm işlər görəcəyini qeyd ediblər. Daha sonra söz Mübariz Həmidova verilib. Uzun illər uğurla çalışmış Mübariz Həmidov teatrın yeni mövsümdə maraqlı, çeşidli repertuar siyasəti ilə çıxış edəcəyini, tamaşaçıların cəlbinə yönəlik kreativ layihələrin gerçəkləşəcəyini və hər bir aktyorun potensial yaradıcılıq imkanlarından obyektiv şəkildə istifadə ediləcəyini bildirib. Həmçinin teatrın 50 illiyi ilə bağlı tədbirlər planının mükəmməl işlənməsi üçün tövsiyyə və tapşırıqlarını verib. "Dövlətçilik, vətənpərvərlik mövzusu, milli-mənəvi dəyərlərin səhnə təcəssümü və əlbəttə ki, tamaşaçıların bədii-estetik zövqünün formalaşması önəmli məsələdir”- deyən direktor hər kəsə uğurlar arzulayıb.