Bu gün işğaldan azad olunan
torpaqlarımız mənən də dirçəlir. 12-13 may tarixlərində Şuşa şəhərinin
məşhur məkanında- Cıdır düzündə keçirilən "Xarıbülbül” Musiqi Festivalı
bunun təsdiqidir.
Azərbaycan Respublikasının Prezidenti İlham
Əliyevin təşəbbüsü və Heydər Əliyev Fondunun təşkilatçılığı ilə
ölkəmizin Mədəniyyət paytaxtı Şuşanın Cıdır düzündə keçirilən
"Xarıbülbül” Musiqi Festivalı Azərbaycan xalqının qüruru, illər boyu
arzuladığı, xəyalını qurduğu hadisədir.
Ölkə başçısının Şuşa şəhərini
ölkənin Mədəniyyət paytaxtı elan etməsi, "Xarı bülbül" festivalını və
Vaqif Poeziya günləri bərpa etməsi ölkəmizin tarixində əlamətdar və
mühüm hadisələrdən biridir.
Məlumat üçün bildirək ki, "Xarı bülbül"
Beynəlxalq Festivalı məşhur xanəndə Seyid Şuşinskinin 100 illik yubileyi
ilə əlaqədar 1989-cu ildən keçirilməyə başlayıb. Gözəl mənzərəsi və
təbiəti ilə seçilən Cıdır düzündə 1992-ci ilədək hər il may ayında "Xarı
bülbül” mahnı festivalı keçirilirdi. Həmin dövrdə bu festival nəinki
Azərbaycanda, bütün keçmiş sovet məkanında, hətta dünya miqyasında
önəmli mədəniyyət tədbirlərindən biri sayılırdı. "Xarı bülbül"
Beynəlxalq Festivalının yenidən öz doğma torpağımızda keçirilməsi bizim
milli mədəniyyətimizi, musiqi ruhumuzu yenidən özümüzə qaytaran
əlamətdar hadisə oldu.
Eyni zamanda "Xarıbülbül" festivalı
Azərbaycan xalqının multikultural dəyərlərini dünyaya təqdim etdi.
Azərbaycanın müxtəlif bölgələrində yaşayan ayrı-ayrı xalqların
nümayəndələrinin musiqi və mədəniyyət nümunələrini festivalda təqdim
etməsi ölkəmizdə multikultiralizmin ən yüksək səviyyədə olmasının
növbəti dəfə dünyaya nümayişi idi.
Festivalın keçirilməsi və Yuxarı
Gövhər ağa məscidində bayram namazı qılınması böyük rəmzi məna daşıyır,
Azərbaycan mədəniyyəti üçün də tarixi anlama malikdir. Bu festival bir
daha Şuşanın Azərbaycan tarixi, mədəniyyəti üçün müstəsna əhəmiyyətə
malik olduğunun göstəricisidir.
Festival hər birimizin qəlbində 44
günlük müharibə günlərində olduğu kimi, eyni duyğular oyatdı. Sanki, hər
kəs yenidən möhtəşəm qələbə sevincini, Şuşanın azad olunması xəbərinin
yaşatdığı duyğulu anları yaşayırdı.
İşğaldan azad olunmuş Şuşa
şəhərində 29 ildən sonra ilk dəfə Ramazan bayramı namazının qılınması da
xalqımızda sevinc hissi oyatdı.
Prezident İlham Əliyevin Şuşada
keçirilən "Xarıbülbül” festivalındakı çıxışı hər birimizin qəlbində
qürur, fərəh, iftixar hissi oyatdı. Əminik ki, bu möhtəşəm festival və
ölkə başçısının çıxışı düşmənə güclü mənəvi zərbə oldu.
Prezident
İlham Əliyev festivaldakı çıxışı zamanı bəyan etdi ki, bu gün Azərbaycan
mədəniyyəti, Azərbaycan mədəniyyətinin görkəmli nümayəndələri Şuşaya
qayıdıblar və bu qayıdış reallıqdır, bu reallıqla hər kəs
hesablaşmalıdır.
İllər sonra igid oğullarımızın canı və qanı bahasına
azad olunmuş Şuşa şəhərində keçirilən "Xarıbülbül” musiqi festivalının
şəhidlərimizin əziz xatirəsinə həsr olunması isə xüsusi əhəmiyyətə
malikdir. Bu festival 44 günlük Vətən müharibəsində əldə etdiyimiz
qələbənin mədəniyyət sahəsində davamı idi. Çox sevindirici haldır ki,
artıq hər il Şuşada "Xarıbülbül” musiqi festivalı keçiriləcək. Gələn il
isə Şuşa şəhərinin 270 illik yubileyi qeyd olunacaq.
Prezident İlham
Əliyev bir daha bəyan etdi ki, biz əbədi qayıtmışıq, burada əbədi
yaşayacağıq: "Bu gün Ramazan bayramı ərəfəsində Şuşada yeni möhtəşəm
məscidin təməli qoyuldu. Ermənilər tərəfindən qurudulmuş "Xan qızı
Natəvan” bulağından bu gün su gəldi. Bütün bunlar böyük rəmzi məna
daşıyır. Bax, bizim qayıdışımız budur. Biz Şuşanı quracağıq, bərpa
edəcəyik”
Bəli, hər bir azərbaycanlı üçün müqəddəs olan bir məkanda
musiqimizin səslənməsi bütün dünyaya qayıdışımızı göstərdi. Bir daha
bizə bu sevinci, və qürur hissini yaşadan, bizi doğma Şuşamıza qaytaran
şəhidlərimizin ruhu qarşısında baş əyirik!
Nazxanım Cəfərova, Tərəqqi medallı,
Sumqayıt şəhər Mərkəzi Kitabxananın baş biblioqrafı
