Ailə, Qadın və Uşaq Problemləri üzrə Dövlət Komitəsi nəzdində fəaliyyət göstərən Şüvəlan Uşaq və Ailələrə Dəstək Mərkəzində Komitə sədri Bahar Muradova istedadlı uşaqlar və gənclərlə görüş keçirib.15 İyun - Milli Qurtuluş Gününə həsr olunmuş görüş Asiya Fakt İnformasiya Ağentliyinin "Sizi tanıyaq” layihəsi çərçivəsində baş tutub. Layihənin məqsədi istedadlı uşaqları, gəncləri cəmiyyətə tanıtmaq, onlara vətənpərvərlik və dövlətçilik ruhunu aşılamaq və müstəqil özünüifadəetmə bacarıqlarını formalaşdırmaqdır.
Tədbirdən öncə uşaqlarla Vətən müharibəsi qaziləri arasında keçirilən görüşdə vətənpərvərlikləri ilə örnək olan qazilərimizin döyüş xatirələri dinlənilib, torpaqlarımızın azadlığı uğrunda canlarını fəda etmiş şəhidlərimizin ruhu ehtiramla yad edilib.
Uşaqları salamlayan Dövlət Komitəsinin sədri Bahar Muradova belə görüşlərin onları daha yaxından tanımaq, fikir və düşüncələrini öz dilindən eşitmək üçün gözəl imkan olduğunu qeyd edib. Bu gün ölkəmizdə uşaqların hərtərəfli inkişafı, ən yaxşı maraqlarının qorunması, onların milli-mənəvi dəyərlər ruhunda yetişməsi istiqamətində lazımi tədbirlərin həyata keçirildiyi bildirilib.
Ulu öndər Heydər Əliyev tərəfindən əsası qoyulan ailə, qadın və uşaq siyasətinin bu gün cənab Prezident İlham Əliyev tərəfindən uğurla davam etdirildiyini qeyd edən sədr, bu siyasətin uğurlu nəticələrinin istər qanunvericilik sahəsində, istərsə də dövlət qurumlarının, qeyri-hökumət təşkilatlarının fəaliyyətində özünü biruzə verdiyini diqqətə çatdırıb.
Tədbirin yekununda xüsusi istedadı, əldə etdiyi uğurları ilə fəqlənən uşaqları təşəkkürnamələrlə təltif edən Komitə sədri, onları Milli Qurtuluş Günü münasibətilə təbrik edib, heyrətləndirici çıxışlarına görə onlara təşəkkürünü bildirib.
Təltif olunanlar arasında Sumqayıt Regional Mədəniyyət İdarəsinə tabe olan Şuşa rayon Malıbəyli kənd Uşaq Musiqi məktəbinin şagirdləri də olub.
Tədbir gənc istedadların vətənpərvərlik mövzusunda çıxışları və onların əl işlərindən ibarət sərgi ilə davam edib.
Xəbərdən istifadə edərkən istinad etmək vacibdir.
