
Sumqayıt Regional Mədəniyyət İdarəsinə tabeli Şuşa rayon Quşçular kənd Uşaq Musiqi Məktəbində 2021-2022-ci ilin yekununa həsr olunan hesabat konserti keçirilib.
İlk növbədə məktəbin direktoru konsertdə iştirak edən qonaqları salamlayıb. Sonra 44 günlük Vətən müharibəsində canından keçən şəhidlərimizin əziz xatirəsi bir dəqiqəlik sükutla yad edilib.
Məktəbin fortepiano, tar, qarmon, nağara və xanəndəlik sinifinin şagirdlərinin ifasında Azərbaycan xalq mahnıları, Azərbaycan və xarici bəstəkarların əsərləri səslənib.
Sonda Sumqayıt Regional Mədəniyyət İdarəsinin rəisi Rəşad Əliyev çıxış edərək, bu ilin Azərbaycan Respublikasının Prezidenti cənab İlham Əliyevin Sərancamı ilə "Şuşa ili” elan olunmasından söhbət açıb və bununla bağlı çoxsaylı tədbirlərin keçirildiyini vurğulayaraq, məktəbin müəllim və şagird kollektivinə uğurlar arzulayıb.
Konsertdə iştirak edən Sumqayıt Regional Mədəniyyət İdarəsinin Şuşa üzrə baş məsləhətçisi Bayram Cəfərli və məktəbin direktorları çıxış edərək, məktəbin kollektivinə xoş arzularını bildiriblər.
Məktəbin nağara müəllimi Əkbər Həsənovun şagirdlərindən ibarət 10 nəfərlik "Zəfər” qrupu məktəbdə keçirilən tədbirdə fəal iştirakına görə Fəxri fərmanla təltif ediliblər.
Xəbərdən istifadə edərkən istinad etmək vacibdir.