2 avqust 1898-ci ildə Bakı elmi-foto dərnəyinin katibi Aleksandr Mişonun lentə aldığı "Bibiheybətdə neft fontanı yanğını”, "Əlahəzrət Buxara əmirinin yolasalma mərasimi”, "Qafqaz rəqsi” sənədli və "İlişdin” adlı bədii süjetlər nümayiş etdirildi və həmin gün Azərbaycan milli kinosunun əsası qoyuldu.
1915-ci ildə Pirone qardaşlarının açdığı səhmdar cəmiyyətləri tərəfindən Bakı, Tiflis, İrəvan şəhərlərində prokat kontorları yaradılmışdır. Həmin il cəmiyyət İbrahim bəy Musabəyovun "Neft və milyonlar səltənətində” romanı əsasında eyni adlı ilk Azərbaycan bədii filminin çəkilişinə başladı. Filmin çəkilişi Sankt-Peterburqdan dəvət olunmuş rejissor B.N. Svetlova həvalə edilmişdi.
1916-cı ildə Uzeyir Hacıbəylinin "Arşın mal alan” operettası əsasında ilk Azərbaycan kinokomediyası çəkildi. 1919-cu ildə, AXC-nin dövrundə "Azərbaycanın müstəqilliyinin ildönümü münasibətilə təntənə” adlı film nümayiş etdirilmişdi.
1923-cü ildə, sovet hakimiyyəti dövründə Azərbaycan Foto-Kino İdarəsi (AFKİ) yaradıldı. Həmin il aprelin 28-də Azərbaycanda Birinci Dövlət Kinofabriki açıldı. Fabrikdə çəkilən ilk film isə ikiseriyalı "Qız qalası əfsanəsi” bədii filmi olub. Sonralar AFKİ: "Azdövlətkino” (1926-1930), "Azərkino” (1930-1933), "Azfilm” (1933), "Azdövlətsənayesi” (1934), "Azərfilm” (1935-1940), "Bakı kinostudiyası” (1941-1959) kimi adlandırılıb. 1960-cı (bəzi mənbələrdə 1961-ci il) ildən isə C.Cabbarlı adına "Azərbaycanfilm” kinostudiyası kimi tanınır.
Indiyədək "Azərbaycanfilm” tərəfindən 2000-dən çox film istehsal edilib. Onlardan "Ad günü”, "Ögey ana”, "Şərikli çörək”, "Nəsimi”, "Sevinc buxtası”, "İstintaq”, "Yaramaz” , "Uzaq sahillərdə”, "Arşın mal alan”, "Bizim Cəbiş müəllim”, "Axırıncı aşırım”, "Sarı gəlin”, "Nabat”, "Ovsunçu”, "Buta”, "Çölçü”, "Axınla aşağı”, "Dolu” və digərləri bir sıra dövlət və beynəlxalq mükafatlarına layiq görülüb.
Ulu öndər Heydər Əliyevin 18 dekabr 2000-ci il tarixli, 588 nömrəli Sərəncamına əsasən, avqustun 2-si kino işçilərinin peşə bayramı – Azərbaycan Kinosu Günü kimi qeyd olunur.
Xəbərdən istifadə edərkən istinad etmək vacibdir.
