Sumqayıt Regional Mədəniyyət İdarəsinə tabe olan Sumqayıtın Tarixi Muzeyində Mədəniyyət işçiləri üçün vikipediya təlimləri keçirilib.
Xeberle.com-a verilən məlumata görə, təlimlər Azərbaycan Respublikasının "Qeyri-Hökumət Təşkilatlarına Dövlət Dəstəyi Agentliyi”nin dəstəyi ilə "Azərbaycan Vikimedia Könüllüləri” İctimai Birliyi tərəfindən "Vikipediya Şuşanı Sevir” layihəsi çərçivəsində təşkil edilib. Tədbiri giriş sözü ilə açıq elan edən Sumqayıt Regional Mədəniyyət İdarəsinin rəisi Rəşad Əliyev qonaqları salamlayaraq, tədbir haqqında ətraflı məlumatı təqdim edib. O çıxışında bu gün dünyanın ən böyük açıq ensiklopediyası olan vikipediyanın Azərbaycanda inkişaf etdirilməsi istiqamətində xeyli tədbirlər görüldüyünü vurğulayıb.
Sonra "Azərbaycan Vikimedia Könüllüləri” İctimai Birliyinin inzibatçısı Toğrul Rəhimli tərəfindən Azərbaycan vikipediyasının tarixi, vikipediyada məqalə yaratmaq, mövcud məqalələri redaktə etmək, təkmilləşdirmək, fotoşəkillər yükləmək haqqında təlim keçirilib. Keçirilən təlim-seminarda idarənin əhatə etdiyi Sumqayıt, Qubadlı, Şuşa və Zəngilan Tarix-Diyarşünaslıq Muzeylərinin və Mərkəzi Kitabxana Sistemlərinin, həmçinin Rəsm Qalereyasının əməkdaşları iştirak ediblər. Təlim-seminarda 9 mədəniyyət müəssisəsindən 20 əməkdaşa sertifakatlar təqdim edilib.
Xəbərdən istifadə edərkən istinad etmək vacibdir.
