Tarixə qısa baxış
Sumqayıt şəhər Dövlət Rəsm Qalereyası respublikanın direktiv orqanlarının qərarı ilə 1967-ci ildə Sumqayıt şəhər Sərgi salonu kimi təsis olunub.1981-ci ilə qədər Azərbaycan Rəsmlər Qalereyasının filialı kimi fəaliyyət göstərib. 1981-ci il dekabrın 31-də Azərbaycan Respublikası Nazirlər kabinetinin 583 № li sərəncamı ilə Sumqayıt Dövlət Rəsm Qalereyası statusunu alıb.Yarandığı gündən bu günə qədər Sumqayıt Rəsm Qalereyasının tarixinə qısaca nəzər salaq. Azərbaycanın təsviri incəsənətinin inkişafında mühüm rolu olan bir çox xalq rəssamlarımızın fərdi sərgiləri Sumqayıt Dövlət Rəsm Qalereyasında nümayiş olunub. Buna misal olaraq, 1968-ci ilin aprelin 7-də Azərbaycan xalq rəssamları N.Əbdürrəhmanovun və T.Salahovun ilk bədii sərgisi açılıb. Azərbaycan xalq rəssamı Bədurə Əfqanlının bədii sərgisi ( 1974-cü il 6 may) 1978-ci ildə Respublika Dövlət şəkil Qalereyasının şəhər filialında Azərbaycan musiqisinin 60 illiyinə və A.Kərimovun yaradıcılığına həsr olunmuş sərgi keçirilib.SSRİ xalq rəssamı M.Abdullayevin fərdi sərgisi ( 1979-cu il 13 iyul), 15 iyun 1983-cü ildə respublikanın əməkdar rəssamı Hafiz Zeynalovun fərdi sərgisi və digər sərgilər nümayiş olunub. Qalereyada fərdi sərgilərlə yanaşı səyyar sərgilər də keçirilib. 1982-ci il Sumqayıt Şəkil qalereyasında "Biz kommunizm qururuq” devizi altinda bütün qardaş respublikalarını təmsil edən sovet rəssamlarının səyyar sərgisi açılıb. Sərgini Azər.SSRİ Rəssamlar İttifaqının katibi, respublikanın xalq rəssamı V.Y.Nərimanbəyov, sərginin direktoru S.E.Radkeviç açıblar.Bunlarla yanaşı, rəsm qalereyasında xarici ölkələrin dekada və incəsənət on günlükləri,xarici ölkə rəssamlarının sərgiləri keçirilib. Buna misal olaraq, 1979-cu il oktyabr ayında Özbəkistan incəsənət günləri, 1982-ci ildə Ruminiyanın Arçeş vilayətindən gətirilmiş uşaq rəsm sərgini, 1987-ci ilin oktyabr ayında Almaniya Demokratik Respublikasının Lüdviqsxafen şəhərindən gətirilmiş alman rəssamların sərgini, 1996-cı ilin aprel ayında İsrail dövlətinin Yerusəlim şəhərindən gətirilmiş İsrail rəssamlarının qravürlərindən ibarət sərgini və s. göstərmək olar.
Yeni dövrə yeniliklərlə
Son illər Rəsm Qalereyasının yararsız hala düşməsi qalereyada keçirilən tədbirlərə öz mənfi təsirini göstərirdi.2003-cü il aprelin 3-də mərhum prezident Heydər Əliyevin Sumqayıta gəlişi, sumqayıtlıların həyatında ən yadda qalan gün oldu. H. Əliyevin Sumqayıt fəallarının qarşısında çıxış edərkən Sumqayıt şəhərinin günü-gündən inkişaf etməsindən danışmaqla yanaşı, Sumqayıtın bir çox problemlərinə də toxunub. Xüsusi ilə Sumqayıtın mədəni-maarif müəssisələrinin bərbad vəziyyətə düşməsi və mədəniyyətə olan biganəlik prezidenti  təssüfləndirib. H. Əliyev  Sumqayıt şəhərinin İcra Başçısı Vaqif Əliyevə bu problemləri aradan qaldırılması üçün müəyyən tapşırıqlar verib.Vaqif Əliyev Rəsm Qalereyasında olaraq qalereyanın şəhər əhalisi üçün böyük əhəmiyyətə malik olduğundan danışıb və qalereyanın yenidən əsaslı təmir olunması üçün müvafiq idarə rəhbərlərinə göstəriş verib.  Az bir müddət ərzində qalereya yüksək səviyyədə əsaslı təmir olunaraq Sumqayıt sakinlərinin ixtiyarına verilib. 26 mart 2004-cü ildə Qalereyanın təmirindən sonrakı açılışı ilə əlaqədar Sumqayıt rəssamlarının əsərlərindən ibarət sərgi təşkil olunub.Açılışdan sonra 17 may 2004-cü ildə Sumqayıt məktəblilərinin rəsmlərindən ibarət sərgi , 26 may 2004-cü ildə III Respublika Karikatura sərgisi, 20 iyun 2004-cü ildə Beynəlxalq Qaçqınlar gününə həsr olunmuş Azəərbaycanda məskunlaşmış məcburi köçkün uşaqların rəsmlərindən ibarət sərgi, 3 iyul 2004-cü il Respublikanın peşəkar rəssamlarının əsərlərindən ibarət sərgi keçirilib.Ümumiyyətlə, 2004-2006-cı illərdə dövlət tədbirləri, əlamətdar günlər və xalqımızın yaşadığı ağır günlərlə əlaqədar olaraq sərgilər təşkil olunub. Bu illər ərzində Sumqayıt şəhər Təhsil şöbəsi,Gənclər və İdman Baş İdarəsi , Uşaq və Yeniyetmələr mərkəzi , Sumqayıt Əlil Qadınlar Cəmiyyəti , Qadın Təşəbbüsü ictimai birliyi, digər müəssisə və təşkilatlarla iş birliyi qurulub.
2007-ci ildən başlayaraq aşağıdakı sərgilər keçirilib:

1.      17 yanvar 2007-ci il 20 yanvar faciəsi ilə əlaqədar sərgi
2.      19 mart 2007-ci il gənc karikaturaçı rəssam Babək Rüstəmzadənin fərdi sərgisi
3.      20 aprel 2007-ci il il Məktəbdən kənar Tərbiyə işi mərkəzinin dərnək rəhbəri Əsgərova Natəvanın fərdi və onun yetirmələrinin rəsmlərindən ibarət sərgi
4.       04 may 2007-ci il Almaniyanın Lüdviqsxafen şəhəri ilə Sumqayıt şəhərinin qardaşlaşmasının 30 illiyi münasibətilə sərgi. Sərgidə Lüdviqsxafen və Sumqayıt rəssamlarının əsərləri nümayiş olunub.
5.       01 sentyabr 2007-ci il Respublikanın peşəkar rəssamlarının əsərlərindən ibarət sərgi
6.       14 sentyabr 2007-ci il UNESCO-nun xətti ilə təşkil edilən və  UNESCO-Almaniyada Dünya İrsi abidələrinin foto sərgisi
7.       18 oktyabr 2007-ci il Azərbaycan Respublikasının Dövlət Müstəqilliyi gününə həsr edilmiş sərgi
8.       12 noyabr Konstitusiya gününə həsr edilmiş sərgi
9.       29 noyabrAzərbaycanın görkəmli və Sumqayıtın gənc rəssamlarından ibarət sərgi
Sumqayıt şəhər Dövlət Rəsm Qalereyası bundan sonrakı fəaliyyəti zamanı öz daxili imkanlarından istifadə etməklə istedadlı gənclərin aşkara çıxarılması məqsədilə sərgi müsabiqələri , görkəmli rəssamların fərdi sərgilərinin təşkil olunmasında səy göstərəcək.
Qalereyaya kim rəhbərlik edir? 
Sumqayıt Dövlət Rəsm Qalereyasının direktoru Ellada Rəşidovanı tanıyaq. E. Rəşidova 4 avqust 1970-ci ildə Sumqayıt şəhərində anadan olub. 1989-1994-cü illərdə N.Tusi adına Azərbaycan Dövlət Pedaqoji Universitetinin Rəsm-xətt, təsviri incəsənət və əlavə əmək fakültəsini bitirərək, rəsm-xətt, təsviri incəsənət və əmək təlimi müəllimi ixtisasına yiyələnib. Mədəniyyət sahəsində bir sıra vəzifələrdə çalışan E.Rəşidova 2007-ci ildən Sumqayıt Dövlət Rəsm Qalereyasının direktorudur. Sumqayıt şəhərinin yaradılmasının 60 illik yubileyi münasibətilə Azərbaycan Respublikası Mədəniyyət və Turizm Nazirliyinin Fəxri Fərmanına layiq görülüb.
Xeberle.com
Mənbə: sumqayit-dct.az