Sumqayıt Regional Mədəniyyət İdarəsinə tabeli Sumqayıt Dövlət Rəsm Qalereyasında Xədicə Səlimlinin fərdi sərgisi keçirilib. Gənc rəssamın müxtəlif mövzuda 60-dan çox rəsm əsərləri nümayiş olunub. Sərgidə Sumqayıt Şəhər İcra Hakimiyyətinin İctimai-siyasi və humanitar məsələlər şöbəsinin müdir müavini Fərman Kazımov, Sumqayıt Regional Mədəniyyət İdarəsinin rəisi Rəşad Əliyev, Sumqayıt Dövlət Universitetinin prorektoru Elmar Xəlilov, universitetin müəllimləri Zəfər Hüseynov, Xalidə Həsənova, Əsəd Məmmədov, AYB Sumqayıt Bölməsinin sədri Gülnarə Cəmallədin, Musiqi Kollecinin direktoru Səbinə Mehdiyeva, şəhid anaları, müəssisə, təşkilat rəhbərləri iştirak ediblər.
Qonaqlar sərgi ilə tanış olduqdan sonra şəhidlərin ruhu bir dəqiqəlik sükutla yad edilib. Tədbiri giriş sözü ilə açan moderator, yazıçı, dramaturq, kulturoloq Hafiz Ataxanlı, insan təxəllüyünün hüdudsuzluğundan, yaradıcılıq prosesindən danışıb. Sərgidə Sumqayıt Şəhər İcra Hakimiyyətinin İctimai-siyasi və humanitar məsələlər şöbəsinin müdir müavini Fərman Kazımov ölkəmizdə yaradıcı gənclərə göstərilən dövlət qayğısından söhbət açaraq, belə sərgilərin uşaqların istedadının üzə çıxarılmasında mühüm əhəmiyyət daşıdığını vurğulayıb və gənc rəssama yaradıcılıq uğurları arzulayıb. Sumqayıt Regional Mədəniyyət İdarəsinin rəisi Rəşad Əliyev ölkədə yaradıcı gənclərə göstərilən qayğıdan danışaraq, keçirilən sərginin bu qayğıya bir bariz nümunə olduğunu bildirib və gənc rəssamın yaradıcılığında önəmli yer tutan qrafika, natürmort, kompozisiyaların səciyyəvi cəhədlərini vurğulayıb. Sumqayıt Dövlət Universitetinin prorektoru Elmar Xəlilov gənc rəssama uğurlar diləyib və onun əsərlərinin Azərbaycanın böyük qürur sərgisi olan Qənimətlər Parkında nümayiş etdirilməsini arzulayıb. Sonra Gülnarə Cəmalləddin, Səbinə Mehdiyeva, Zəfər Hüseynov, Xalidə Həsənova, Reyhan Yunisova, şəhid anası Ruhiyyə Əhmədova çıxış edərək, Xədicənin rənglər dünyasında təbiətə sevgi ilə yanaşmaq, yurdu qorumaq, təbiətin bəxş etdiyi minbir nemətin qədrini bilmək kimi ülvi duyğuların əks olunduğunu qeyd ediblər. Sumqayıt Dövlət Rəsm Qalereyasının direktoru Ellada Həsənova çıxışı zamanı belə sərgilərin keçirilməsinin yaradıcı gənclərin dünyaya inteqrasiya olunmasında əhəmiyyətli rol oynamasını söyləyib və Xədicə Səlimliyə uğurlar arzu edərək, Sumqayıt şəhər Gənclər İdman Baş İdarəsinin və Sumqayıt Dövlət Rəsm Qalereyasının hədiyyə və fəxri fərmanlarını gənc rəssama təqdim edib.
Sonda gənc rəssam Xədicə Səlimlinin anası şəhər rəhbərliyinə, sərginin təşkilatçılarına və qonaqlara öz minnətdarlığını bildirib.
Sərgidə Sumqayıt Musiqi kollecinin müəllimi Könül Bəkirovanın rəhbərlik etdiyi kollektivi, musiqiçi Şəhriyar Musayev və müğənni Zaur Yusifli musiqi nömrələri ilə çıxış ediblər.
Xəbərdən istifadə edərkən istinad etmək vacibdir.
