Bizi maraqlandıran, oxucular üçün gərəkli olan bir neçə sualımıza cavab verməsini xahiş etdim. Sağ olsun, dəyərli vaxtından ayırıb öz sahəsinin incəliklərindən, həkimlik təcrübəsindən, bu peşənin çətin və gözəl tərəflərindən danışdı . 

Ağalatlılara  məxsus saflıqla söylədi ki, həkim olmaq, insanların sağlamlığı keşiyində dayanmaq həm şərəfli, həm də məsuliyyətlidir. Yaşamasına gümanı çox az olan xəstələrin ümid dolu baxışlarında həyat eşqini alovlandırmaq, ömürlərinə ömür calamaq vəzifə borcumdu. İnsanların mənə olan inamını hər zaman yaşatmağa çalışıram. Nəyə nail olduğumu ətrafdakılar daha yaxşı bilirlər. Ağ xalatda qara ləkə görməkdən həmişə qorxmuşam. İnsan öz ömrünü ləyaqətlə yaşamalıdır. Tibb elminin atalarından sayılan Hippokratın sevib-seçdiyim sənət haqqında fikrinin nə qədər sərrast ifadə edildiyinə heyran qalıram: "Həkimlik sənətinə məhəbbət elə insanlığa məhəbbətdir.”

Bir anlığa ümummilli liderimiz Heydər Əliyevin həkimlərimizin əməyinə verdiyi yüksək qiyməti xatırladım: "Həkimlik peşəsi öz xalqına, sənətinə yüksək sədaqət tələb edən bir işdir.” Ulu Öndərimizin vəfalı ömür-gün yoldaşı, görkəmli oftalmoloq-alim, akademik Zərifə xanım Əliyeva isə belə  söyləmişdir: "Həkimlər insanlara günəş kimi lazımdır!”  Bu sözlərdən ilhamlanaraq deməliyəm ki, həkimlik bir insan üçün ömür boyu öyrənməyi, yenilənməyi, daim müasir fikirlər, çarələr axtarmağı tələb edən bir peşədir.

İşini yaxşı bilən, təcrübəli, savadlı tibb işçisinin qapısını döyənlər həmişə çox olur. Haqqında söz açdığım Yelmar Süleymanov da belə həkimlərdəndir. O, neçə-neçə xəstəyə sevinc bəxş edib, qayğıkeşliyi ilə özünə böyük hörmət qazanıb. Xəstələri çox səmimi qarşılayır və və təmkinlə dinləyir,  mütəmadi əlaqə saxlayaraq onların səhhətiylə maraqlanır, lazımi məsləhət və tövsiyələrini verir. Əməyinə verilən ən böyük, əvəzsiz dəyər, mükafat isə insanların sevgisidir. 

Yelmar Əjdər oğlu Süleymanov 1976-cı il sentyabrın 13-də Azərbaycanın dilbər guşəsi olan Qubadlı rayonunun Göyyal kəndində nüfuzlu, hörmətə malik ailədə anadan olub.  Fərcan kənd orta məktəbində oxuyub. Sonra məcburi köçkünlük həyatı başlayıb. Azərbaycan Dövlət Tibb Universitetinə təhsili alıb. 2000-2001-ci illərdə anesteziologiya-reanimotoligiya ixtisası üzrə internatura keçib.

Torpaqlarımızın işğal altında olmasını qəbul edə bilməyən həkim könüllü olaraq ordu sıralarına gedib - həkimlik peşəsini şərəfli hərbçi peşəsi ilə birləşdirib. 2002-2004-cü illərdə ön xətdə hərbi həkim işləyib, tibb xidməti baş leytenantı olub. 

O, 20 ildən çoxdur ki, səhiyyə sahəsində çalışır, gərgin iş şəraitinə baxmayaraq, xoş təbəssümünü xəstələrdən əsirgəmir. Daim mütaliə edir, müasir tibbi  biliklərə yiyələnir, yenilikləri öyrənir, onları praktik işdə tətbiq etmək isə ona daim uğur gətirir. Müasir müalicə üsullarından bacarıqla istifadə etməyə çalışır.

Həmişə də narahatdır, harasa tələsir.Tələsir ki, dünyaya körpə gətiərəcək qadınların  imdadına tez çatsın, onların sağlamlığını, həyat ritmini daha tez bərpa etsin. Hər birinə öz doğması kimi yanaşır. Çox vaxt yuxusuz gecələr, ac-susuz, stressli günlər keçirir. Minlərlə insanı ağır xəstəlikdən xilas edib. Hər birinə öz doğması kimi yanaşır. Söz düşəndə deyir ki, xəstə həkimin yanında özünü rahat hiss etməli, vəziyyətini sərbəst şəkildə, doğru-düzgün bildirməlidir. 

Yelmar Süleymanov indiyədək respublikamızda və Türkiyədə ixtisası üzrə bir çox seminarlarında, müvafiq kurslarda iştirak edib. Həmçinin Moskvada Kulakov adına Perintal Mərkəzdə ixtisasartırma kursunda olub. Sertifikasiya imtahanlarından uğurla çıxıb.  2019-cu ildə cənab Prezident İlham Əliyevin Sərəncamı ilə "Tərəqqi” medalına layiq görülüb. Səhiyyə sahəsində göstərdiyi səmərəli fəaliyyətinə görə bu yaxınlarda "İlin həkimi” adını qazanıb. Bu təltiflər onu daha səylə çalışmağa, etimadı doğrultmağa ruhlandırıb. 

Söylədi ki, Mərkəzin rəhbəri, Əməkdar həkimTəranə Rəcəblinin tələbkarlığı və qayğıkeşliyi sayəsində daha həvəslə işləməkdən zövq alır. Bu səhiyyə ocağı müasir tibbi avadanlıqlarla - İntellektual yaddaşı olan süni tənəffüs, ultrasəs aparatları, monitorlar və s. ilə təmin olunub. İxtisaslaşmış mərkəz kimi buraya respublikamızın əksər rayonundan xəstələr müraciət edirlər, onlardan diqqət və qayğımızı əsirgəmirik. Dünyada yeganə olan "TAP Block” metodundan, həmçinin inkişaf etmiş ölkələrdə olduğu kimi, anaların rahatlığı üçün ağrısız, keyfiyyətli doğuş üsullarından istifadə edirik. Tətbiq olunan icbari tibbi sığorta sisteminin tələblərini müvəffəqiyyətlə yerinə yetiririk. Şöbəmizdə 37 nəfər yüksək ixtisaslı həkim, orta və kiçik tibb işçisi çalışır. Ağır reanimasiyalı xəstələrin qulluğunda dayanırıq. Əvvəlki illərlə müqayisədə xəstəliklərin sayında daha çox artım müşahidə olunur. Hər bir qadın ana olmaq, dünyaya övlad gətirmək arzusundadır. Körpənin sağlamlığı isə birbaşa ananın sağlamlığından asılıdır. Məhz bu səbəbdən xəstələr vaxtaşırı  müayinələrdən keçməli, məsuliyyətli olmalıdırlar. Bu həm onların, həm də gələcək övladlarının sağlamlığı üçün çox önəmlidir. Qadınlar yer üzündə mələklərimizdir. Ana olmaq isə ən böyük xoşbəxtlikdir. Başlıca istəyim xalqımızı sağlam görməkdir.

Yeganə sevincimi isə sözlə ifadə etməkdə acizəm. Sevinirəm ki, artıq doğma torpaqlarımız düşmən əsarətindən azaddır. İki qardaşım Mayıl və Qismət Süleymanovların Birinci Qarabağ Müharibəsinin qazisi olması ilə də fəxr edirəm. 

Yelmar həkim daha sonra söylədi ki, müsbət keyfiyyətləri özündə əxz etməyində hər əziyyətə qatlaşan atası Əjdər kişinin xüsusi rolu vardır. Həmsöhbətim uşaq vaxtı prokuror olmaq istəyib. Lakin bu fikrindən daşınıb. Deyir ki, bu peşəyə yiyələnməyim əsasən anam Sədəf xanımın arzusu olub. Ona görə də altıncı sinifdə oxuyarkən həkim olmaq qərarına gəldim. Peşman deyiləm. 

Öyrəndim ki, həyat yoldaşı Elnurə xanım tibb bacısıdır. Bu ailədə bir qız, bir oğlan böyüyür. Onlar da atası kimi ağxalatlı olmaq istəyirlər. 

Əminliklə deyə bilərəm ki, o, əsl həkimdir.