Sumqayıt şəhər Gənclər və İdman Baş İdarəsi və Qızıl Aypara Cəmiyyətinin Sumqayıt şəhər bölməsinin birgə təşkilatçılığı ilə Gənclər evində "Ümumdünya Sağlamlıq Günü” ilə bağlı tədbir keçirilib. Tədbirdə müxtəlif sahələrdə çalışan gənclər, o cümlədən Respublika Qızıl Aypara Cəmiyyətinin İcraçı katibinin müavini, "Sağlamlıq şöbəsi”nin kuratoru Səbinə Məhbubi-İran, Səhiyyə Nazirliyinin nəzdində olan "İctimai Səhiyyə və İslahatlar mərkəzi”nin "Layihələrin idarə olunması” üzrə şöbə müdiri Səbinə Babazadə, "İctimai səhiyyə və İslahatlar mərkəzi”nin İnformasiya və kommunikasiya şöbəsinin rəhbəri Aynur Rəşidova və "İcmaya əsaslanan sağlamlıq proqramı”nın rəhbəri Mətanət Qaraxanova da iştirak ediblər. İştirakçılar arasında Sumqayıt şəhər Səhiyyə və Təhsil şöbələrinin rəhbərliyi, Gigiyena və Epidemiologiya şöbəsi, Sumqayıt şəhər Profilaktik Dezinfeksiya İdarəsi, Sumqayıt Dövlət Universiteti, Müəllimlər İnstitutu, Sumqayıt Dövlət Texniki Kolleci, Sumqayıt Tibb Kollecinin müəllim və tələbə heyəti, məktəb şagirdləri də olub. Tədbiri giriş sözü ilə açan Sumqayıt şəhər Gənclər və İdman Baş İdarəsinın rəisi Elşən Baxşaliyev qonaqları salamlayaraq tədbirin mahiyyəti barədə iştirakçıları məlumatlandırıb. QAC Sumqayıt şəhər bölməsinin sədri Mətanət isə çıxışında bu ilin ayparaçılar üçün önəmli olduğunu bildirib. O, 95 illik yubileyini qeyd edən Azərbaycan Qızıl Aypara Cəmiyyətinin fəaliyyəti, 2015-ci ildə Azərbaycan Qızıl Aypara Cəmiyyətinin yaradılmasının təşəbbüskarı, məşhur tarixi şəxsiyyət, general-leytenant Əliağa Şıxlinskinin 150 illik yubileyi, Azərbaycan Qızıl Aypara Cəmiyyətinin fundemental prinsiplərinin 50 illik yubileyi haqqında təddbir iştirakçılarına məlumat verib. Sonra Qızıl Aypara Cəmiyyətinin İcraçı katibinin müavini, "Sağlamlıq şöbəsi”nin kuratoru Səbinə Məhbubi-İran "Ümumdünya Sağlamlıq günü" ilə bağlı "Təhlükəsiz qidalanma” mövzusunda vidieçarx nümayiş etdirib və mövzu ilə bağlı təqdimatla çıxış edib. Sonda Ümumdünya Səhiyyə Təşkilatı (ÜST) tərəfindən hazırlanan və "İctimai səhiyyə və İslahatlar mərkəzi" tərəfindən tərcümə olunan bukletlər tədbir iştirakçılarına paylanıb. 

Xeberle.com