Hər an, hər dəqiqə insanların sağlamlığının keşiyində duran, onların köməyinə tələsən həkimlər xüsusi diqqət və hörmətə layiqdirlər. Ən çətin günlərdə insanlardan öz köməyini əsirgəməyən ağ xalatlı həkimlər sübut edirlər ki, tibb işçiləri cəmiyyətimizi, insanları qoruyan müqəddəs peşə sahibləridir. Hər il iyun ayının 17-də bu müqəddəs peşə sahiblərinin peşə bayramı kimi qeyd olunur. Bu münasibətlə Respublikanın bütün tibb müəssisələrində təntənəli tədbirlər keçirilir. TƏBİB-in tabeliyində olan Sumqayıt Tibb Mərkəzi də bu baxımdan xüsusilə fərqlənir və hər il tibb işçilərinin peşə bayramı münasibətilə silsilə tədbirlər keçirilir, ağ xalatlı həkimlər bir araya toplaşır və işində xüsusilə fərqlənənlər rəhbərlik tərəfindən təltif olunur.
Bu dəfə də öz ənənəsinə sadiq qalan Sumqayıt Tibb Mərkəzi tibb işçilərinin peşə bayramı münasibətilə möhtəşəm tədbir keçirib. Tədbirdə Sumqayıt Tibb Mərkəzinin direktoru Elnur Azadxanov, Sumqayıt şəhər İcra Hakimiyyəti başçısının birinci müavini Teymur Səmədov, şəhərin tibb müəssisələrinin rəhbərləri və tibb işçiləri iştirak ediblər.
Öncə dövlət himni səsləndirilib və torpaqlarımızın bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edilib.
Ardınca çıxış edən Sumqayıt Tibb Mərkəzinin direktoru Elnur Azadxanov bütün tibb işçilərini peşə bayramları münasibətilə təbrik edib, onlara gələcək fəaliyyətlərində uğurlar arzulayıb. O, həkimliyin çox nəcib bir peşə olduğunu deyib. Həkimlərin insanların sağlamlığını qorumaq, onlara ömür bəxş etmək və yaşatmaq üçün yorulmadan çalışdıqlarını diqqətə çatdırıb. Elnur Azadxanov əlavə edib ki, Azərbaycanda tibb müəssisələrinin maddi-texniki bazasının gücləndirilməsi, yeni tibbi texnologiyaların tətbiqi, köklü kadr islahatları və aparılan digər tədbirlər onu dünyanın qabaqcıl ölkələrinin səviyyəsinə çıxarmağa imkan yaradıb. Tibb müəssisələrinin təmiri və bərpası, regionlarda müasir tipli xəstəxanaların tikilərək istifadəyə verilməsi, tibbi sığorta sisteminin tətbiq olunması səhiyyə sahəsində aparılan islahatların əsas istiqamətlərini təşkil edib.
Daha sonra tədbirdə çıxış edən Sumqayıt şəhər İcra Hakimiyyəti başçısının müavini Teymur Səmədov icra başçısı Zakir Fərəcovun təbriklərini tibb işçilərinə çatdırıb. Bildirib ki, ümid yeri olmaq, xəstələrə şəfa vermək xeyirxah olduğu qədər də gərəkli və müqəddəs işdir. Teymur Səmədov bu şərəfli işdə bütün həkimlərə və tibb işçilərinə uğurlar arzulayıb.
Çıxışlardan sonra Sumqayıt şəhər İcra Hakimiyyəti başçısının sərəncamı ilə təltif olunan bir qrup səhiyyə işçisinə fəxri fərmanlar təqdim edilib. Həmçinin Sumqayıt Tibb Mərkəzi tərəfindən təltif olunan səhiyyə işçiləri səhnəyə dəvət edilib və onlara diplomlar verilib.
Rəsmi hissədən sonra tədbir konsert proqramı və səhnəciklərlə davam etdirilib.
Xəbərdən istifadə edərkən istinad etmək vacibdir.
