"İnsan gözə nur bəxş edərsə, özü də əbədiyaşar olur."
Nur saçan alim
28 aprel – Azərbaycan elminin, Azərbaycan səhiyyəsinin, bütövlükdə Azərbaycan qadınının parlaq siması olan Zərifə Əliyevanın doğum günüdür.
Bu gün biz yalnız böyük bir alimin deyil, bir xalqın qəlbində iz buraxan, nəsillərə nümunə olan bir həyat yolunun sahibini xatırlayırıq.
Zərifə Əliyeva – elmə, insanlığa və vətəninə bütün varlığı ilə bağlı olan bir ziyalı idi. O, oftalmologiya elminə yeni nəfəs, yeni yol gətirdi, insanların gözlərinə nur, könüllərinə sevinc bəxş etdi.
Elm və mərhəmət işığında
Zərifə xanım Azərbaycan Tibb İnstitutunu fərqlənmə diplomu ilə bitirərək, ömrünü tibb sahəsində çalışmalara həsr etdi.
Onun əsas elmi istiqaməti sənaye müəssisələrində işləyən insanların göz sağlamlığının qorunması oldu. Zərifə Əliyeva Azərbaycanın səhiyyə sistemində ilk dəfə olaraq peşəkar göz xəstəliklərinin profilaktikasına dair elmi əsaslar yaratdı.
Onun bu sahədəki fundamental tədqiqatları bu gün də oftalmoloqlar üçün dəyərli mənbədir. Alim həmçinin, peşə xəstəliklərinin qarşısının alınması üçün praktiki tədbirlər planı hazırlayaraq, minlərlə insanın sağlamlığını qorumağa töhfə verdi.
İnsanlıq məktəbi
Zərifə Əliyeva təkcə elm adamı deyildi. O, eyni zamanda böyük bir humanist idi.
Xəstələrinə yalnız bir tibbi fakt kimi yox, bir insan, bir dünya kimi yanaşırdı.
Onun xəstələrə olan sonsuz qayğısı, tələbələrə göstərdiyi diqqət, gənc həkimlərə verdiyi dəstək əsl insanlıq məktəbi yaratmışdı.
O, sadə və səmimi rəftarı, müdrikliyi və yüksək mənəviyyatı ilə hamının hörmətini qazanmışdı.
Zərifə Əliyevanın həyat devizi belə idi:
"Elm ancaq insanlara xidmət edəndə dəyər qazanır.”
Qəlblərdə yaşayan irs
Bu gün Zərifə xanımın adı yalnız elmi əsərlərində, tədris etdiyi tələbələrdə və yaratdığı məktəbdə yaşamır.
Onun adı Azərbaycan xalqının qəlbində əbədiyaşardır.
O, nur saçan bir ömür yaşadı və özü də nura çevrildi.
Zərifə xanım Əliyevanın elmi irsi, insani dəyərləri və işıqlı xatirəsi gələcək nəsillərə yol göstərməyə davam edir.
Nur içində yat, Zərifə xanım!
Ruhun şad olsun!
Təranə RəcəbliSumqayıt Tibb Mərkəzinin direktor müavini,
Perinatal Mərkəzin rəhbəri
Xəbərdən istifadə edərkən istinad etmək vacibdir.
