"Azərikimya” İB-nin konfrans zalında kimyaçılara tibbi sığorta xidməti göstərilməsinin vəziyyəti  ilə bağlı geniş tədbir keçirilib.
"Azərikimya” İB-nin rəhbərliyinin, Birliyin struktruna daxil ilan idarə və müəssisələrin məsul işçilərinin, müvafiq şöbələrin rəislərinin, həmçinin "Paşa Sığorta” ASC-nin, "Premium Assist Group” MMC-nin və Sumqayıtda fəaliyyət göstərən özəl klinikaların baş həkimlərinin iştirak etdiyi tədbirdə əvvəlcə Risklərin idarə olunması şöbəsi tərəfindən 2013-2016-cı illər ərzində kimyacılara göstərilmiş tibbi sığorta xidmətinin bütün detallarını özündə əks etdirən təqdimatla tanış olunmuş, iştirakçılara könüllü tibbi sığortadan istifadə, müraciət edənlərin sayı və çeşidi, klinika-xəstə münasibətləri, tibbi xidmətin vəziyyəti ilə bağlı keçirilmiş sorğunun nəticələri, işçilərin irad və təklifləri, aradan qaldırılmış problemlər və s. haqqında geniş məlumat verilmiş, "Kimyaçı” poliklinikasının rəhbərliyinin gündəmə gətirilmiş məsələlərə münasibəti dinlənilmişdir.
Sonra Sumqayıt şəhərində fəaliyyət göstərən  "Real”,  "Unikal”, "Şəfqət” və  "Qəlb” klinikalarının rəhbərləri tərəfindən iştirakçılara rəhbərlik etdikləri klinikaların fəaliyyətini əks etdirən video-çarx təqdim olunmuş, klinikaların fəaliyyət istiqamətləri, mövcud şərait və sığorta şirkətləri ilə əməkdaşlıqlarının vəziyyəti, tibbi xidmətin daha da yaxşılaşdırılması istiqamətində həyata keçirdikləri tədbirlər haqqında ətraflı məlumat verilmişdir.
 "Paşa Sığorta” ASC-nin və "Premium Assist Group” MMC-nin məsul işçiləri iştirakçılara tibbi sığorta xidmətləri haqqında geniş məlumat vermiş, klinikalarla aparılan iş və tibbi xidmətlərlə bağlı qeyd olunan irad və təkliflərə münasibətlərini bildirmişlər.