Vaxtaşırı portalımızda sağlamlıqla bağlı Sumqayıtın tanınmış həkim və mütəxəssisləri ilə söhbətləri təqdim edirik. Budəfəki mövzumuz insanın ən vacib orqanlarından sayılan göz barəsindədir. Və razılaşın ki, günümüzdə də ən çox yayılan xəstəliklərin bir qismi gözlə bağlıdır. Öncə vurğulayaq ki, bu sahədə yazılar yalnız tövsiyə xarakterlidir və düzgün müayinə, diaqnoz yalnız tibb müəssisələrində müəyyən edilə bilər. Beləliklə, budəfəki qonağımız ''Unikal Klinika''nın həkim-oftalmoloqu Ramin Xəlilovdur. Onunla hazırda daha çox yayılan göz xəstəliklərindən, göz əməliyyatlarından, eynəklərin düzgün seçilməsindən, gözləri düzgün qoruma yollarından söhbət açmışıq. Xeberle.com həmin müsahibəni təqdim edir:

- Göz ən vacib insan orqanlarından biridir. Sizcə, hazırda insanlar bu vacibliyi nə qədər dərk edir? Gözümüzü qoruya bilirikmi?
- Siz doğru dediniz, həqiqətən də göz insan orqanizminin ən vacib orqanlarından biridir. Çünki biz ətraf mühitdən olan informasiyaların 95%-ni gözlərimiz vasitəsilə qəbul edirik. Lakin təəssüf ki, biz göz sağlamlığımıza lazımi diqqət ayırmırıq.
- Günümüzdə daha çox nələr bizim gözümüzə mənfi təsir göstərir? Biz hazırda İKT, sürətlə inkişaf edən computer-smartfon əsrində necə davranmalıyıq ki, gözlərimizi qoruyaq?
- Müasır dünyada elm və texnikanın sürətli inkşafı insanın görmə orqanının daha çox çalışmasına və nəticədə göz yorğunluğuna, görmə qüsurlu xəstələrin gözlərinin daha çox zəifləməsinə, uşaqlarda və yeniyetmələrdə uzaqdangörmə zəifliyinin yaranması və proqressivləşərək çoxalmasına gətirib çıxarır. Bunun üçün biz kompüterlə göz arası məsafəni 40-50 sm saxlamalı, kitab oxuyarkən uşaqlar və yeniyetmələr onu şaquli vəziyyətdə saxlayan altlıqlardan istifadə etməli, bel qamətini düz saxlamalı, başlarını boyun hissədən kitabın üzərinə əyməməli, oxuma məsafəsini 35-40 sm saxlamalı, oxuduqları hissədə təbii işıqlanmanın olmasına fikir verməlidirlər.
- Sumqayıtda hansı göz xəstəlikləri daha çox yayılıb? Sizcə, bunun səbəbləri nədir?
- Sumqayıtda əksər göz xəstəliklərinə rast gəlinir. Uşaqlar və yeniyetmələr arasında görmə qüsurları olaraq daha çox çəpgözlük, gözün iltihabı və allergik xəstəlikləri, boyüklərdə katarakta (el arasında "mirvari suyu”), qlaukoma (el arasında "qara su” deyilir) diabetik göz dibi ağırlaşmaları, sarı ləkə xəstəliyi və sair göstərmək olar. Bunun səbəbləri çoxdur. Əksər xəstəliklər genetik yolla ötürülür, düzgün olmayan həyat tərzi xəstəliklərin gedişatını sürətləndirir.
-Yaxındangörmə xəstəliklərinin əsas səbəbi nədir? Bu patalogiyanı birdəfəlik aradan qaldırmaq olarmı?
-Yaxındangörmə xəstəliyi yaxını yaxşı və uzağı zəif görmə deməkdir və səbəbi çox vaxt gözün öndən arxaya doğru uzunluğunun normadan artıq olması ilə əlaqədərdir və uşaq 18 yaşa çatana qədər böyümə dövrü ilə əlaqədar proqressivləşir. Bunu birdəfəlik aradan qaldırmaq yalnız 18 yaşdan sonra lazer əməliyyatı vasitəsilə mümkündür.
- Bəs lazer əməliyyatları nə dərəcədə effektivdir. Bu gün adıçəkilən əməliyyatlar cəmiyyətdə birmənalı qarşılanmır. Sizin bununla bağlı mövqeyiniz necədir?
-Əgər gözün bütün parametrlərləri əməliyyata uyğun gəlirsə 98% uğurlu nəticə gözlənilir.
-Gözlükdən istifadə edənlərə nə tövsiyə edirsiniz? Gözlüklər necə seçilməlidir?
-Gözlükdən istifadə edənlərə gözlük dərəcələrinin ixtisaslı həkim tərəfindən təyin olunmasını və həkim məsləhətlərinə riayət etmələrini məsləhət görürəm.
-Göz məşqləri nə dərəcədə effektiv olur? Bəzən deyirlər belə məşqlər nəticəsində hətta gözlükdən də azad olmaq mümkündür.
-Göz məşqləri göz yorğunluğunda effekt verə bilər. Lakin zəifgörmə gözün anatomik quruluşu ilə əlaqədar olduğundan göz görməsini normaya gətirə bilməz.
-Gözlər yorulduqda ev şəraitində hansı tədbirlərin görülməsinin tərəfdarısınız. Çay suyu və sair kimi vasitələr nə qədər faydalıdır?
-Gözlər yorulduqda görmə yükünü azaltmaq lazımdır. Çobanyastığı və çay dəmindən ilıq kompress şəklində istifadə etmək olar.
- Göz problemi yaşayan insanlara tövsiyələriniz.
Göz problemi yaşayan insanlara sağlam həyat tərzi sürməyə, yaşıl, sarı, narıncı rəngli meyvələrlə qidalanmağı və həkım nəzarətində olmağı məsləhət görürəm.

Söhbətləşdi: Elnur Ağayev