Vaxtaşırı oxucularımızı ümumi tibbi biliklərlə tanış edir, müxtəlif xəstəliklər, onların profilaktikası barədə məlumatlandırmağa çalışırıq. Əlbəttə ki, müvafiq peşə sahibinin dili ilə... Həkimlərlə müsahibələrimizi davam etdiririk. Budəfəki həmsöhbətimiz "Unikal klinika”nın terapevti Gülnarə Ağayevadır. Onunla dövrümüzün əsas xəstəlikləri və onunla mübarizə yollarından, həmçinin yeni müalicə vasitələrindən söhbət açmışıq. Xeberle.com terapevt Gülnarə Ağayeva ilə müsahibəni təqdim edir.

HAŞİYƏ: Gülnarə Ağayeva 1998-ci ildə Azərbaycan Tibb Universitetinin terapiya fakültəsini bitirib. Ali təhsilini başa vurduqdan sonra müxtəlif seminar və kurslarda iştirak edib. 1999-cu ildən 1 saylı Sumqayıt şəhər poliklinikasında çalışır. 2015-ci ilin iyun ayından "Unikal klinika”da terapevtdir.

 

- Terapevt olaraq müayinələr zamanı son vaxtlar əsasən hansı xəstəliklər müşahidə edirsiniz?
- Son vaxtlar ən çox rast gəlinən patologiyalar qaraciyər, mədə-bağırsaq sistemi, arterial hipertoniya, ağciyərlərin müxtəlif xəstəlikləridir. Bunun əsas səbəbi isə psixi amillər, qidalanma rejminin düzgün olmaması, ekologiya, az hərəkətli həyat tərzi, alkoqoldan müntəzəm istifadə və sairdir.

- Hazırda insanlar artıq çəkidən, piylənmədən əziyyət çəkirlər. Bu da bir çox orqanların fəaliyyətini pozur. Belə halların qarşısını almaq üçün nələri tövsiyə edərdiniz?

-Bəli, günümüzdə insanlar piylənmədən çox əziyyət çəkirlər. Artıq piy dəri altına toplanaraq insanların normal bədən formasını pozmaqla yanaşı, digər orqan və toxumalara da (ürək, damar və sair) yığılır və onların fəaliyyətini çətinləşdirir. Piylənmə qaraciyər üçün xüsusilə təhlükəlidir. Qaraciyər isə bu zaman tamamilə piy toxuması ilə dolduğu üçün onun hüceyrələri öz normal funksiyasını yerinə yetirə bilmir. Bunun üçün insanlar hər hansı narahatçılıq, ağrı olarsa, həkimə müraciət etməlidirlər ki, xəstəliklərinin qarşısını ağırlaşmamış alsınlar.
Qeyd edim ki, kişilər arasında ağciyər və prostat xəstəlikləri daha geniş yayılıb. Qaraciyərin patalogiyası son dövrün problemlərindədir. Qaraciyər piylənməsi zamanı insanlar yağlı qidalardan, alkoqoldan özlərini gözləməlidirlər. Qida rasionunda ən çox təzə meyvə və tərəvəzə üstünlük verməlidirlər.

 

 

 

- Yayda daha çox hansı xəstəliklər yayılır? İnsanlar daha çox özlərini nələrdən qorumalıdır?
- Yay aylarında əsasən böyrəklərin iltihabı, işalgiya, mialgiya, mədə-bağırsaq xəstəliklərinə daha çox rast gəlinir. Bunun üçün insanlar köhnə qidalardan, soyuq içkilərdən özlərini gözləməlidirlər. Üstəlik müxtəlif həşəratların dişləmələri zamanı dəridə qızartı, göynəmə və qaşınma kimi problemlər də baş qaldıra bilər. Bu zaman həkim tövsiyəsi ilə xüsusi preparat və kremlərdən istifadə etmək olar. Günvurma və istivurma da yay fəslinin əsas "dərd”idir. Gün vurma – günəş şüalarının uzun müddət ərzində orqanizmə təsiri nəticəsində baş verir. Gün vurma əksər hallarda, başı açıq şəkildə xeyli müddət ərzində gün altında qaldıqda baş verir. Belə hallarda gün şüalarının təsiri nəticəsində baş beyinə qan axını artır və beyinin qan dövranı pozulur. Bu zaman zərərçəkəndə zəiflik, ürəkbulanma, başgicəllənmə, güclü baş ağrıları, qulaqlarda küy, təngnəfəslik, nəbzin tezləşməsi, üşütmə, ürək bulanması və qusma, temperaturun 40 C və daha artıq dərəcəyə yüksəlməsi kimi əlamətlər qeyd edlir. Ağır hallarda qıcolmalar və huşun itirilməsi də ola bilər. Bəzi hallarda bu əlamətlər dərhal, bəzi hallarda isə açıq günəş altında qaldıqdan bir neçə saat sonra evə gəldikdə baş verir. Gün vurmanın ilkin əlamətləri qeyd edilən kimi zərərçəkəni kölgəyə və ya sərin otağa aparmaq, onu sıxan paltarları çıxarmaq, yarıoturaq vəziyyətdə uzatmaq lazımdır (başı bədənindən yuxarıda olmalıdır!). Zərərçəkənə soyuq su verilməli, üzünü və sinəsini soyuq su ilə silmək lazımdır. Başına, boyunun yan tərəflərinə, qoltuqaltı və qasıq nahiyyələrinə (iri damarlar keçən yerlər) buz və ya bu mümkün olmadıqda soyuq su ilə kompress qoyulmalıdır. Bu zaman əl və ayaqlara xardal kağızı da qoymaq olar. Daha bir üsul – paltarını soyundurub zərərçəkəni soyuq suda isladılmış parçaya bükün, başına buz qoyun. Zərərçəkənin temperaturu normaya çatdıqda onu quru parçaya və ya dəsmala bükün. Xəstənin vəziyyəti ağırlaşarsa, dərhal "təcli yardım” çağırılmalıdır.

- Bəzən həkim və xəstələrdən dərmanların keyfiyyəti ilə bağlı narazılıqlar eşidirik. Sizcə, bu bəhanədir, ya həqiqətən də onlar haqlıdırlar!?
- Əlbəttə, şikayətlər haqlıdır. Dərman şirkətlərinin çox olmasına baxmayaraq, çalışırıq ki, illərin sınağından keçən, yüz minlərlə xəstələr üzərində özünü doğruldan preparatları tövsiyə edək.

- Son zamanlar ozonterapiya adlı müalicə növü də insanlarda maraq doğurur. Buna bir qədər aydınlıq gətirməyinizi istərdik.

- Ozon Yer üzərində həyatın qoruyucusudur. Ozonoterapiya orqanizmdə maddələr mübadiləsini sürətləndirir, immuniteti möhkəmləndirir, həmçinin ağrıkəsici, intoksikasiya əleyhinə yaxşı təsir göstərir. Ozonun müsbət xüsusiyyətlərindən biri də odur ki, onun təsirindən mikroblar məhv olduğu halda insan hüceyrələri mənfi təsirə məruz qalmır, əksinə enerji əldə edir. Ona görə də pasiyentlər ozon terapiyasından sonra özlərində güc və enerji hiss edirlər.

- Ozon hansı xəstəliklər zamanı istifadə olunur?

- Əsasən mədə-bağırsaq traktı xəstəlikləri, hepatit virusu, şəkərli diabetin fəsadları, xroniki infeksiyaların müalicəsi, allergiyanın müxtəlif növləri, eyni zamanda hamiləlikdə geniş istifadə olunur. Qeyd edim ki, bu üsulun analoqu yoxdur. Klinkamızda bu müalicə üsuluna özünəməxsus yanaşma tərzi var. Bizə müraciət edən pasientlerin şikayətlərindən asılı olaraq onlar yoxlanılır və hər biri üçün fərdi müalicə metodu müəyyənləşdirilir. Xatırladım ki, bizdə ozonla böyük autohemoterapiya da aparılır.
- Hidrokalon haqqında nə deyə bilərsiniz? Son vaxtlar bu da qabaqcıl müalicə üslü kimi tanınır.

- Hidrokalonterapiya yoğun bağırsaqların su, müxtəlif bitki çayları ilə oksigenlə yuyulması prosesidir. Təsir effektivliyinə görə ən azı 10 imaləyə bərabərdir. Hidrokalonterapiya "Unikal klinika”sında müasir texnika və birdəfəlik rektal nabor vastəsilə aparılır. Yoğun bağırsağın funksiyası, forması bərpa olur. Habelə, orqanizmin su balansı normallaşır, hüceyrə mübadiləsi aktivləşir, çəkinin azalması baş verir və digər orqanların qan təchizatı normallaşır. Müayinəyə göstərişlər belədir: Qəbizlik, diareya, parazitar infeksiyalar, artıq çəki və digər bir sıra xəstəliklərin profilaktikası. Elə düşünməyin ki, bu, yalnız xəstə insanlar üçündür. Əslində, bağırsaq yuyulması sağlam həyat tərzi keçirən insanlar üçün də vacibdir. Bu terapiyanı keçənlər özlərinin gümrahlaşmasını, cavanlaşmasını da hiss edirlər.
- Müayinələr ilə bağlı nə məsləhətlər verə bilərsiniz. Daha dəqiq, profilaktika üçün hansı yaşlarda hansı müayinə metodları olmalıdır və hansı tezliklərdə aparılmalıdır?

- Proflaktik olaraq hər bir şəxsin 6 aydan bir müayinələrdən keçmələri tövsiyə olunur. Xəstəliklər cavanlaşdığına görə 30 yaşdan sonra EKQ, USM kimi müayinələrdən də mütləq keçilməlidir. Şəhərimizin sakinləri klinkamızda ən son avadanlıqlarla təchiz olunmuş aparatlarla özlərini tam müayinə etdirə bilərlər.
Çalışaq sağlam qalaq. Hamıya cansağlığı, sağlam həyat tərzi arzulayıram!
Söhbətləşdi:Elnur Ağayev
Xeberle.com

Xəbərdən istifadə edərkən istinad etmək vacibdir.