"Azərbaycanda 2016-ci ilin son hesablamalarına əsasən, 212 min 577 nəfər şəkərli diabet xəstəsi rəsmi qeydiyyatdadır”

Bunu Mirqasımov adına Respublika Klinik Xəstəxanasının Respublika Endokrinoloji Mərkəzinin direktor müavini Babek Salek Diabet Günü ilə bağlı keçirilən tədbirdə deyib.

B.Salek qeyd edib ki, I tip şəkərli diabet xəstələrinin sayı 28924, II tip şəkərli diabet xəstələrinin sayı isə 183653 nəfərdir. 

"2016-cı il üçün dövlət büdcəsindən şəkərli dibaetlə bağlı dövlət proqramına 40,1 mln manat vəsait ayrılıb. Dünyada hər 11 nəfərdən biri şəkərli diabet xəstəsidir. 75 faiz şəkərli diabet xəstəsi olan insanlar aşağı və orta gəlirli ölkələrdə yaşayır. Hazırda dünyada 415 milyona yaxın şəkərli diabetlə xəstəsi var. 2040-ci ildə bu rəqəmin 642 milyon olması ehtimal edilir”. 

B.Salekli qeyd edib ki, şəkərli diabetin skrininqi xəstələyin erkən aşkarlanmasını, erkən tibbi müdaxiləni, fəsadların erkən aşkarlanmasını təmin edir. "Böyüklər arasında 2-ci tip şəkərli dibaet xəstəsi olan hər 2 nəfərdən biri öz xəstəliyi haqqında məlumatsızdır. Şəkərli diabetlə xəstə olduqlarını bilməyənlər isə ağır fəsadlar əmələ gəldikdən sonra həkimə müraciət edirlər. Ancaq düzgün qidalanma, fiziki aktiv həyat tərzi, pis vərdişlərdən imtina 70 faizə qədər şəkərli dibaetin 2-ci tipi ilə xəstələnmənin qarşısını alır. Bu isə o deməkdir ki, 160 milyona qədər insan şəkərli dibaetə tutulacaq”.

Direktor müavini vurğulayıb ki, əvvəllər II tip şəkərli diabet xəstəliyinə (ŞD) 45-50 yaş arası insanlarda rast gəlinirdisə, indi bir yaşındakı uşaqlarda bu xəstəlik olur. 

I tip xəstələr arasında 1150 nəfərin uşaqlar olduğunu deyən direktor müavini bildirib ki, onların 99 faizi insulindən asılı formadadır: "Xəstələrin sayında artım və cavanlaşma müşahidə olunur. Dünyada bu gün 500 mindən artıq uşaq I tip şəkərli diabet xəstəsidir. Əvvəllər II tip xəstəliyə 45-50 yaş arasında rast gəlinirdisə, indi 30 yaşında da bu xəstəliyə rast gəlinir. Hətta bir yaşında uşaqlarda da bu xəstəlik olur. Dünyada hər 11 nəfərdən biri şəkərli diabetlə xəstədirsə, bu rəqəm 2040-cı ildə 10 nəfərə düşəcək. Hər 6 saniyədən bir şəkər xəstəsi vəfat edir. Bu ya infarkt, ya insult, ya da böyrək çatışmazlığı səbəbindən olur. Dünyada 46,5 faiz insanın (yəni hər iki nəfərdən biri) öz xəstəliyindən xəbəri yoxdur"(AzVision.az)

Xəbərdən istifadə edərkən istinad etmək vacibdir.