Dərmanlar xəstələndiyimiz zaman əksəriyyətimizin dərhal müraciət etdiyi kimyəvi məhsullardır. Hətta bəzilərimiz üçün dərman yaşama mənbəyidir. Elə dərmanlar var ki, onlardan gündəlik həyatımızda faydalanır və həkimin resepti olmadan belə onları rahatlıqla əldə edə bilirik. Lakin son zamanlar əczaxanalara daxil olduqda əvvəllər reseptsiz əldə etdiyimiz dimedrol, marqanisofka və s. kimi dərmanları almaq üçün artıq resept tələb olunur. Bəs görəsən, bu dərmanların hazırda reseptlə satılmasını şərtləndirən amillər nələrdir? Bu barədə məlumat almaq üçün Səhiyyə Nazirliyinin Analitik Ekspertiza Mərkəzi ilə əlaqə saxladıq. İdarənin ictimaiyyətlə əlaqələr şöbəsinin mütəxəssisi Esmira Ələkbərovanın sözlərinə görə, dərmanların reseptlə satılıb-satılmayacağı ilə qərarları istehsalçıların özləri verirlər.  
Məsələ ilə bağlı ekspert Vüqar Sarıyevin də fikirlərini öyrəndik: "Dimedrol, marqanisofka və sair kimi qeyd etdiyiniz dərmanlar həmişə reseptlə və yazan həkimin möhürü ilə satılıb. Yəni qanun bunu tələb edir. Əvvəllər və elə indinin özündə də bu dərmanları reseptsiz satanlar var. Təbii ki bu da ucdantutma hamıya yox, daimi müştərilərə, tanıdıqları şəxlərə və s. satılır. Bu tip dərmanları satmaq üçün aptekin xüsusi lisenziyası olmalıdır. Aptek də hər bir dimedrol və digər bu kimi psixatrop, yuxugətirici, güclü ağrıkəsici və s. dərmanlari satdığı adamın qeydiyyatını aparmalıdır ki, Səhiyyə Nazirliyinin buna cavabdeh olan qurumlarına versin. Həm də bu dərmanlar dövlət proqramına uyğun olaraq stasionar şəraitdə müalicə alan xəstələrə verilir. Xəstəxanalarda bu dərmanlar olur, amma aptekler söylədiyim lisenziya olmazsa, buna sata bilməzlər. Məndə olan məlumata görə hazırda Sumqayıtda belə aptek yoxdur. Amma gizlin yollarla bir çox aptek tərəfindən bu dərmanlar satılır. Apteklərdə satışı qadağan olunan dərmanların siyahısı çoxdur və buna nəzarəti Daxili İşlər Nazirliyi həyata keçirir. Onların veb-səhifəsində bu dərmanların adlarını tapa bilərsiniz. Buraya təkcə siz dediyiniz dərmanlar deyil, müxtəlif istiqamətli dərman vasitələri də aiddir”.
Qeyd edək ki, Daxili İşlər Nazirliyinin səhifəsində dövriyyəsi məhdudlaşdırılmış, qadağan edilmiş və reseptsiz satışına icazə verilməyən dərmanların adları xüsusi olaraq açıqlanmasa da, həmin psixatrop maddələrin və prekursorların siyahısı ictimaiyyətə təqdim olunub. Düşünürük ki, istehsalçılar da məhz bu səbəblərə görə bəzi dərman pereparatlarının reseptsiz satışına məhdudiyyət və qadağalar qoyub.
Elnarə Salamova
Xeberle.com

Xəbərdən istifadə edərkən istinad etmək vacibdir.