Sumqayıt şəhər Vərəm Əleyhinə Xəstəxananın pasiyentləri son vaxtlar dövlətin verdiyi dərmanların onlara pul ilə satılmasından şikayətlənirlər. Xeberle.com-a müraciət edən şikayətçilər bundan başqa xəstələr analiz laboratoriyasının işçisi Aidə Zalovanın xidmət qarşılığında pul istəməsi və pul verilmədiyi təqdirdə onları təhqir etməsindən narazılıq edirlər. Xəstəxananın baş həkimi Asif Quliyev Xeberle.com-a açıqlamasında səhiyyə ocağında dərmanların pul ilə satılmasına heç bir şəkildə yol verilmədiyini qeyd edib: "Dərmanlar gələn kimi xəstələrə paylanılır. Elə dərmanlar var ki, onlar sırf xəstələrin adlarına, elələri də var ki, orta hesabla xəstəxanamıza gətirilir və biz onları xəstələrə pulsuz şəkildə veririk. Hətta mən qapının üzərinə də vurub yapışdırmışdım ki, dərmanlar pulsuzdur və altında öz nömrəmi qeyd etmişdim. Dərmanların pul ilə verilməsindən şikayətlənənlər mənə müraciət etsinlər, çünki mən tapşırmışam ki, onlar dövlət tərəfindən göndərilir və buna görə də təmənnasız olaraq xəstələrə verilməlidir. Elə vaxt olur ki, dərmanlar bitir və mən xəstələrə deyirəm ki, gedin şəxsən dolabı açın baxın. Bunu ona görə edirəm ki, qoy öz gözləri ilə görsünlər və sözlərimə şübhə ilə yanaşmasınlar”. Baş həkim Aidə Zalova haqqında deyilənlərə də münasibət bildirib: "Aidə xanım illərdir bizim xəstəxanada işləyir. Bu vaxta qədər xəstələrdən onun haqqında heç bir şikayət eşitməmişəm. Əksinə o daim işində intizamlı olub və şəraitdən asılı olmayaraq vəzifəsini layiqincə yerinə yetirməyə çalışıb”. Aidə Zalova haqqında səslənən ittihamların həqiqətəuyğun olmadığını deyir: "Mənim necə biri olduğum barədə xəstəxananın baş həkimindən soruşa bilərsiniz. Mən heç kimi təhqir etməmişəm, əksinə hamı ilə mehriban olmağa çalışıram. Bu vaxta qədər heç kimdən pul tələb etməmişəm və buna mənim ixtiyarım da yoxdur. 23 ildir ki, burada işləyirəm və bu illər ərzində məndən heç kim şikayət etməyib. Heç vaxt kimisə incitməmişəm”.