Havanın temperaturunun kəskin düşməsilə hər birimizin ən yüngül xəstəlik sandığımız , həkimə getmədən evdə müalicə etməyə çalışdığımız soyuqdəymə, qripə yoluxma halları kəskin artıb.
Əslində qrip virusa yoluxmadan 1 və ya 2 gün sonra başlayır. Adətən ilkin əlamətləri asqırma və qızdırma olur. Qrip virus tərəfindən törədilən nəfəs yollarının kəskin infeksiya xəstəliyidir. Əsas simptomları titrəmə, qızdırma, boğaz ağrısı, əzələ ağrıları, kəskin baş ağrısı, öskürmə, zəiflik və ümumən narahatlıqdır.
 
Bunların arasında boğaz ağrısı, qızdırma və öskürək ən çox rast gəlinənləridir. Qrip kəskin şəkildə olduqda sətəlcəmə çevrilir, ağırlaşma hallarında isə ölümlə nəticələnir. Biz isə ya həkimlərə, ya dərmanlara inamsızlıqdan xəstəliyi evdə, "moruqlu”, "zoğallı” çayla sağaltmağa çalışırıq...
Səhiyyə Nazirliyi (SN) Respublika Taun Əleyhinə Stansiyanın (RTƏS) Xüsusi təhlükəli yoluxucu xəstəliklərin epidemiologiyası şöbəsinin müdiri, tibb elmləri namizədi Rita İsmayılova açıqlamasında deyib ki, qrip virusu ilə bağlı iki nümunə daxil olub:
 
"Onlarda da nəticə mənfi olub”-deyə o bildirib.
R.İsmayılova qeyd edib ki, özündə qrip əlamətləri hiss edən şəxslər mütləq həkimə müraciət etməlidirlər:
"Bizdə əksəriyyət ev şəraitində müalicə alır. Ağırlaşma olanda isə "qripdir, keçəcək” deyirlər. Əslində isə həkimə müraciət etmək lazımdır”.(Modern.az)

Xəbərdən istifadə edərkən istinad etmək vacibdir.