Sumqayıt şəhər səhiyyəsinə cavabdeh olan Səkinə Sadıxovanın karantin qaydalarını pozduğu ilə bağlı fikirlər dolaşır.
Xeberle.com-un əldə etdiyi məlumata görə, səhiyyə şöbəsinin müdiri 3 gün bundan öncə şəhərdə fəaliyyət göstərən tibb müəssisələrinin baş həkimlərinin iştirakı ilə toplantı keçirib. İddiaya görə, həmin iclasda 20 nəfər iştirak edib. Bu isə ölkədə tətbiq olunan xüsusi karantin qaydalarının pozulmasıdır. Qaydalara əsasən əvvəllər 10 nəfərdən yuxarı şəxsin toplaşması qadağan edilirdisə, son dəyişikliklərə əsasən bu rəqəm 5-ə endirilib. Bununla yanaşı, 2 saylı Doğum evində COVİD 19 testi pozitiv çıxmış hamilə qadınların sağlam zahılarla bir otaq şəraitində saxlandığı da yayılan xəbərlər arasındadır. Eyni zamanda, pandemiya xəstəxanasında çalışan tibbi personal üçün ayrılmış oteldə yer tapılmadığı da deyilir. Qeyd olunur ki, növbədən çıxan bəzi həkim heyətinə modul tipli xəstəxanada qalmaq təklif olunur.
İddialarla bağlı Sumqayıt şəhər Səhiyyə Şöbəsinin müdiri Səkinə Sadıxova ilə əlaqə saxladıq.
S. Sadıxova Xeberle.com-a açıqlamasında yayılan məlumatlara belə münasibət bildirib:
"Yanvar ayından başlayaraq bütün karantin qaydalarına əməl etmişəm və heç bir halda da iclas etməmişəm. Bütün işlərimi telefon vasitəsi ilə həll edirəm, lakin Operativ Qərargahın xüsusi tapşırığı ilə biz bir dəfə də olsa toplaşmalı idik. Karantin qaydaları gözlənilərək, sosial məsafə və izolyasiya qaydaları gözlənilərək poliklinikalarla ayrı, stasionarlarla ayrı iclas etmişik".
Şöbə müdiri 2 saylı Doğum evi ilə bağlı yayılan xəbərlərə də aydınlıq gətirib:
"Doğum evlərində də, stasionarlarda da çirkli və təmiz zonalarının ayrılması tapşırılıb. Girişlərdə izolyasiya olunmuş otaqlar yaradılıb, çünki virus çox yayılıb, kimin yoluxmuş, kimin yoluxmamış olduğunu artıq ayırd etmək olmur. Ona görə də bütün xəstəxnalarda təlimata uyğun işlər aparılır".
S. Sadıxova tibb işçilərinin sayına görə şəhər rəhbərliyi tərəfindən otellər ayrıldığını qeyd edib. Növbədə olduğu müddətlərdə bütün tibb personalı həmin otellərdə qalır: "Lakin son gün yaxma analizi verilir ki, onun da cavabı bir sutka ərzində çıxır. Tibbi personalı həmin bir sutkanı modul tipli xəstəxananın 3-cü korpusunda keçirir. Hələ ki, korpus boşdur, xəstə yerləşdirilməyib və bütün lazımi şəraitlə də təmin olunub".
Xədicə Səxavətqızı
Xəbərdən istifadə edərkən istinad etmək vacibdir.
